Den un conferencia di prensa dialuna ultimo, Parlamentario Endy Croes a baha pisa riba e “Parlamentarionan di Panlefi” di AVP. Croes a desenmascara con e fraccion di AVP-Futuro ta keda ridiculo, wardando riba Hulandesnan di Raad van State pa dicta nan opinion riba HOFA, pasobra nan mes no tin “weso di lomba” pa defende Aruba.
Presidente “Remote Control” y e secuestro di Parlamento
Croes a splica cu Parlamento di Aruba simplemente no ta funciona debidamente bou di mando di Marlon Sneek. “Marlon Sneek ta traha riba remote control. Mike Eman ta esun cu ta primi e boton y Marlon ta obedece,” Croes a sentencia.
E prueba di mas grandi di e secuestro aki ta e carta di 13 sindicato cu tin for di october 2025 ta pidi un reunion riba e tema di HOFA. Pasobra e sindicatonan ta contra e ley aki, Mike Eman a duna ordo pa sconde e carta y no yama e reunion.
Gobernador mes mester a duna Marlon un “scual” mereci
Despues di hopi presion di oposicion y un carta oficial manda pa Gobernador di Aruba, porfin e berdad a sali na cla. “Nos a compronde cu Gobernador a manda yama Marlon Sneek aden y a ranc’e orea basta formal,” Croes a revela.
Segun Articulo 23 di Reglamento di Ordo, e Presidente tin e obligacion di yama un reunion pidi pa 3 miembro dentro di 30 dia. Pero Marlon Sneek a sconde e peticion di e sindicatonan pa 143 dia largo! Ta despues di e “scual” di Gobernador, Sneek a core yama e reunion pa dia 19 di maart ultimo.
Lista di peticionnan di mas di 240 dia bieu!
Endy Croes a saca e lista di e reunionnan cu Marlon Sneek tin drumi riba nan:
- RWZI (AWSS): Peticion for di 3 di juli 2025 (mas di 240 dia bieu!).
- Desaroyo Petrolero: Peticion for di 12 di januari 2025, cu ainda no a haya atencion.
- Sindicatonan: 143 dia pa atende un preocupacion nacional.
“Marlon, hopi wowo ta wak bo”
Croes a termina mandando un advertencia cla pa e Presidente di Parlamento: “Democracia mester wordo respeta. Bo meta ta pa sirbi pueblo, no pa sirbi Mike Eman tras di cortina.”
Despues di e scual di Gobernador, awor diripiente Sneek a cuminsa programa reunionnan pa luna di april. “Haci drechi, pasobra tin hopi wowo ta wak bo y esnan rond di bo!”
