Mientras cu formacion di gobierno ta den su proceso, Parlamento di Aruba mester sigui funciona normal di acuerdo cu ley. Sinembargo nos a tuma nota cu Presidente di Parlamento actual Gerlien Croes, kende por cierto ta formado di e proximo coalicion no ta domina e materia completo. E ta haci expresionnan sin consulta of investiga y como Presidente di Parlamento momento bo bisa algo pueblo mester por kere den bo como cu nan ta sali for di e punto cu bo ta haci bo huiswerk y bo mester ta un “voorbeeldfunctie”.
Segun Gerlien Croes staatssecretaris ta hancra den nos Constitucion:
Gerlien Croes a sali expresa den prensa cu e funcion staatssecretaris ta hancra den nos Staatsregeling di Aruba (Constitucion). Esaki sinembargo no ta cuadra cu berdad y e ta un mentira fragante y nos lo bay na splica esaki awe den detaye.
Kico ta un Staatssecretaris?
Na Hulanda esaki ta regla den art 46 di nan Grondwet y ora un cartera di un minister ta hopi grandi por apunta un staatssecretaris, kende lo yuda e minister haci parti di su trabou. E staatssecretaris na Hulanda ta wordo nombra y kita a traves di un Koninklijk Besluit. Parlamento por manda yama e staatssecretaris y por dune tambe un mocion di desconfiansa y mand’e cas.
Na Aruba esaki simplemente no ta existi y Gerlien a gaña:
Den Staatsregeling di Aruba na capitulo 2 (II) ta regla gobierno. (Regering).
Art 2.1 ta reglamenta kende ta gobierno y su definicion.
1. De regering wordt gevormd door de Koning en de Ministers.
2. De Koning wordt vertegenwoordigd door de Gouverneur.
3. De ministers zijn verantwoordelijk aan de Staten.
Pues ningun, pero ningun caminda den Staatsregeling di Aruba na definicion di kende ta gobierno no ta inclui “staatssecretaris”, pues esaki no ta existi y no ta regla den Constitucion y pesey Presidente di Parlamento mester haci su huiswerk miho y no expresa mentira na pueblo.
Entre aña 1983-1985 a traha masha duro riba Staatsregeling Aruba:
Momento cu Betico Croes a logra Status Aparte pa Aruba dia 12 di maart 1983, cual a drenta na vigor 1 di januari 1986 ta masha hopi trabou a wordo haci. Entre otro mester a prepara Staatsregeling pa Aruba. Pa logra esaki Aruba mester 2/3 parti di voto den parlamento, esta 14 voto pa esaki por wordo aproba. MEP e tempo aya a boga pa regla y hancra (2 staatssecretaris) den nos Constitucion capitulo 2 (II). Uno pa “Openbare Orde” y un otro pa “Handel, Industrie en Toerisme”. AVP lidera pa Henny Eman e tempo aya a protesta enorme pa oranan largo. Segun AVP esaki ta pa MEP acomoda su hendenan. Pa por a logra “consensus” pa aproba Staatsregeling di Aruba den parlamento cu 14 voto MEP mester a saca e posicion di (2) staatssecretaris for di e Staatsregeling sino AVP no lo a vota “voor”. Den e tramite aki di ultimo ora e expertonan (sigur hopi cansa e tempo aya) a saca staatssecretaris for di e articulo principal capitulo 2 cu ta regla “regering”, pero a laga “per abuis” e palabra staatssecretaris den capitulo 3 art 17, cual mi lo splica esaki.
Staatsregeling Capitulo 3(III) art 17:
E articulo aki ta splica: Elk lid van de Staten heeft het recht vragen te stellen aan de ministers en de staatssecretaris. De ministers en de straatssecretaris beantwoorden deze vragen binnen redelijke termijn. Pues aki pa un eror a laga staatssecretaris den e texto aunke cu na capitulo 2 (II), cual ta reglamenta, kende ta gobierno esaki no ta regla y pues Staatssecretaris no ta existi den Constitucion di Aruba. Sinembargo, den e “Memorie van Toelichting di Staatregeling Aruba” capitulo 3 (III) art 17 claramente ta splica amplio y ta “verwijs” akiden solamente na ministers y ningun caminda ta papia di staatssecretaris. Esaki ta e prueba cu ta clarifica e eror den e capitulo aki. Duidelijk ta cu pa nombra un staatssecretaris na Aruba mester cuminsa pa cambia Staatsregeling Aruba y pa cambia esaki mester dos tercera parti di parlamento pa bay di acuerdo, esta 14 voto. Un cos ta sigur cu di MEP nan lo no haya e sosten pa esaki. Presidente di Parlamento Gerlien Croes a gaña pueblo door di bisa cu esaki ta hancra den nos Constitucion. Mentira! Haci bo huiswerk.
