Parlamentario Endy Croes na un manera basta indigna a reaciona den un punto di ordo diabierna ultimo den Parlamento yamando tanto Mike Eman, Gerlien Croes y Geoffrey Wever pa BENDE PATRIA, TRAIDORNAN y ENTREGUISTANAN promer cu Presidente di Parlamento a core cera e microfono y saca Parlamentario Croes for di aire.
Gabinete Eman Croes y Wever a falta respet total pa Parlamento y Pueblo di Aruba
Pa varios luna Fraccion di MEP ta rogando pa un reunion pa ricibi informe riba negosacion pa un posibel ‘Rijkswet’cu Gabinete Eman Croes y Wever ta negoshando cu Hulanda. Como cu MEP tin experencia amplio den negosacionnan cu Hulanda a keda manda carta pa presidente di Parlamento pa yama un reunion publico pa gobierno duna informacion y pa pueblo di Aruba tambe por sigui esaki. Finalmente Presidente di Parlamento a yama dicho reunion diabierna ultimo. Enbes cu Mike, Gerlien y Geoffrey bin informa Parlamento riba e negosacionnan pa un posibel ley di Reino nan a drenta, pidi palabra y anuncia cu Gobierno a bay di acuerdo cu e ‘Rijkswet’ y cu esaki diabierna 29 di Augustus a wordo trata caba den ‘Rijksministerraad’ na Hulanda. E momento ey a laga reparti e ley cu ya caba a wordo presenta y aproba den ‘Rijksministerraad’ na Hulanda pa Parlamentarionan na Aruba. Un acto di cobardia, bende patria, entreguista unda manera ladronnan di anochi ta bende nos autonomia pa un saco di placa sin informa representantenan di pueblo y sin consulta cu pueblo. Jennifer Reyes hungando wega cu Mike Eman manera un gran traidor ta pidi 2 siman di schorsing pa bay lesa e ley aki achteraf. Marlon Sneek e Presidente di mas zwak cu Parlamento a conoce den historia ta schors e reunion sin duna chens na esnan cu a yama e reunion cu ta MEP y PPA pa hiba palabra. Pues e sinberguensanan di AVP y Futuro no solamente a entrega nos autonomia financiero na Hulanda pero awor ta atraca Democracia den Parlamento di Aruba tambe. Nos ta lamenta profundo pa un lucha tenaz cu a wordo hiba cu sanger, sodor y lagrimas lidera pa Betico Croes den algun minuut ta wordo entrega bek na Hulanda pa un grupo cu nunca a forma parti di e lucha aki. Nos no lo laga esaki te akinan. Dialuna awor pa 7.30 pm nos ta invita militancia di MEP pa un reunion di caracter di urgencia na Cede di MEP. Dia 29 di Augustus 2025 ta forma un bes mas parti di Augustus scur pero e biaha aki den un bachi di entreguista y traidornan Mike Eman, Gerlien Croes y Geoffrey Wever.
