Parlamentario Endy Croes: Gobierno ta den winterslaap mientras un oportunidad di ORO pa nos economia ta pasa nos dilanti

Parlamentario Endy Croes ta lansa un advertencia serio na comunidad: Aruba ta perdiendo un oportunidad historico pa reactiva nos economia. Mientras Merca y Venezuela a habri porta pa inversionnan multi-biyonario den sector petrolero, Gobierno di Aruba parce di ta drumi, permitiendo cu interesnan politico chikito ta stroba e progreso di nos pais.

Un cambio radical den region. Desde principio di januari 2026, e panorama den nos region a cambia completamente. Cu e cambio di mando na Venezuela, e relacion cu Merca a drecha den un tempo record. President Donald Trump mes a reuni cu 17 compania petrolero gigante pa duna nan e garantia necesario pa nan inverti mas di 100 biyon dollar den e region aki.

Dia 13 di februari ultimo, Merca a otorga dos licencia crucial cu ta permiti companianan manera Chevron, Repsol, Shell, BP y Eni pa re-anuda nan operacionnan “totalmente”. Esaki ta nifica cu biyones di dollar lo cuminsa move den nos bisiña, y Aruba, pa su posicion geografico, mester ta e prome den fila pa probecha di esaki.

Gobierno di Aruba den winterslaap. Fraccion di MEP ta bati alarma pasobra, mientras e oportunidad di “ORO” aki ta bati na nos porta, Gobierno di Aruba no ta duna señal di bida. For di 12 di januari, MEP a pidi un reunion publico den Parlamento pa debati riba e tema aki, pero te awe Coalicion (AVP/FUTURO) ta nenga di trata e asunto.

Parlamentario Croes ta splica cu e falta di accion aki tin un motibo politico: “Ta lamentabel cu e partido mas grandi (AVP) ta bay na ‘amen’ di e partido mas chikito (FUTURO), djis pa proteha nan agenda di desmantelacion. Nan kier desmantela e refineria sin sikiera explora e oportunidadnan nobo cu tin awe.”

Urgencia pa un di dos pilar economico. Aruba tin mester di un di dos pilar economico banda di turismo. Segun Croes, reactivando nos “Tankfarm” pa storage y transhipment di petroleo, nos por genera entrada y trabou hopi liher pa nos hendenan. “Bienestar general mester bin prome cu interes di cualkier partido. Nos no por sera wowo pa e realidad regional djis pasobra un partido chikito den coalicion ta desea esey,” Croes a enfatisa.

E parlamentario ta termina bisando cu tempo no ta necesariametne na nos fabor: “Awe nos ta na tempo pa actua. Si nos keda drumi, aki 6 luna nos lo ta laat y e oportunidad lo a pasa pa otro isla. Ban hunto resona nos bos pa exigi cu Gobierno pone interes di Aruba na prome luga.”