Parlamentario Endy Croes a expresa su sentido di gratitud na e hecho cu FIFA oficialmente tabata presente na Aruba pa lansa e “FIFA Milestone Event” cual a tuma lugar dialuna ultimo den GPT Stadion.
Kico esaki ta encera?
FIFA hunto cu nan miembro Arubaanse Voetbal Bond (AVB) cu sosten di Gobierno Gabinete Wever Croes 2 a inicia cu e proyecto conoci como Talent Development Scheme (TDS) desde aña 2022. Un proyecto unda ta identifica talentonan hoben di clubnan y ta firma un contracto cu dicho Club y mayornan pa e talentonan aki ricibi e oportunidad pa wordo desaroya pa un otro nivel. FIFA a inverti y paga pa un FIFA Talent Coach, Chris Beardsley bin Aruba y setup esaki. Claro hunto cu nos localnan kendenan ta hinca hopi tempo y pasion den deporte di futbol pa logra e desaroyo aki. Dia 27 di Augustus 2024 tabata un otro dia historico unda FIFA TDS Academy U12 a wordo lansa oficialmente den Double Down Ballroom. Un total di 23 atleta di 6 diferente Club den presencia di nan mayornan a firma pa forma parti di e proyecto aki.
Kico tabata entreotro e rol di Gobierno?
Gabinete Wever Croes 2 mediante su Minister e tempo aya a compromete cu FIFA na aña 2022 cu lo bay renoba Stadion Dakota pa Aruba por tin un Stadion acredita pa standardnan di FIFA. E compromiso aki tabata sumamente nesesario y a yuda tambe yega na varios otro proyectonan y inversionnan grandi di FIFA. Pa locual ta trata e proyecto di TDS Gobierno su rol ta pa subsidia e atletanan na Educampus pa 2 aña pa garantisa cu e proyecto por a inicia. Tur 23 atleta lo bay Educampus pa asina por tin un agenda mas flexibel y por train 6 sesion pa siman diferente orario tanto mainta y atardi. Meta final ta pa mantene e grupo aki hunto y prepara e hobennan aki entre otro pa campeonato di CFU 2026 (U14) y sigui pa U17.
Un otro momento historico tabata dialuna ultimo momento representantenan oficial di FIFA entre otro e Technical Director di FIFA Steven Martens y Ian Greenwood kendenan a felicita Aruba como e promer isla den Caribe cu ta logra e proyecto aki y e number 4 den mundo. Tambe tabata impresionante momento a pasa un discurso di e Presidente actual di FIFA e Italiano Gianni Infantino riba un screen grandi kende a felicita y gaba Aruba. Palabranan di elogio di presidente di FIFA pa Presidente Randolf Lacle di Aruba y tur cu a pone nan schoudernan bou di e bunita proyecto y logro aki. TDS awe promociona como Talent Aruba Academy sigur ta bay ta un exito y lo yuda forma nos talentonan y hiba Aruba na un nivel mas competitivo den e long term vision. Parlamentario Endy Croes ta termina bisando cu el a keda contento di por a mira actual minister Gerlien Croes brasa e proyecto aki dunando hopi elogio y indica asina su sosten incondicional na continuacion di e proyecto cu a inicia na 2022. Deporte finalmente ta sali gana!
