Parlamentario Endy Croes no ta kere cu Mike Eman por “walk away” manera nada no a pasa. Nos ta respeta nos instancianan y ta kere cu nan ta funciona y ta pesey Parlamentario Croes ta en busca kende of kendenan a faya den henter e proceso aki di Mike Eman. Kende a tapa of sconde pa Mike? Aki Ministerio Publico tin un rol hopi importante como cu nan tin e hermentnan legal pa investiga y haci e preguntanan concreto pa saca afo, unda nos sistema a faya.
Mike Eman a ricibi hopi transferencia di placa preto:
Mike Eman “himself” a ricibi durante eleccion di aña 2013 diferente transferencia bancario di suma di 50 mil dollar, esta 90 mil florin di entre otro Roberto Rincon. Rincon a wordo castiga na Merca pa soborno di mas di 1000 miyon US Dollar. Mike Eman a ricibi donacion gigantesco pa cumpra voto y cera campaña na 2013 cu un “lighting parade” cu 13 banda musical cu tur cos paga. A cambio Benny Sevinger a otorga Rincon un tereno di 4000m2 na Balashi den un record di tempo. Un carta cu a wordo “hand delivered”. Straño ta cu ningun musca a bula riba e transferencianan aki. Parlamentario Endy Croes a entrega keho oficial na Ministerio Publico desde 3 di juni 2020 momento cu esaki a bira conoci y a logra haya prueba. Croes mes a cuminsa su propio investigacion pa saca afo ken ta tapa pa Mike Eman. E banco envolvi? Kico Ministerio Publico a haci cu e keho oficial?
Parlamentario Croes a cuminsa su propio investigacion:
Riba website di Banco Central a encontra cu “Richtlijn Integere Bedrijfsvoering” maart 2015. E articulo 1 den e richtlijn di Banco Central tin un parti, unda ta splica di incidente. Articulo 13 ta stipula hopi cla con un “instelling” mester atende cu un incidente. E incidente den e caso di Mike Eman a wordo atendi conforme richtlijnen? Articulo 13 c ta splica “de informatieverstrekking aan de CBA” y 13 d ta stipula cu de instelling (pues un banco por ehempel) “informeert de CBA schriftelijk omtrent incidenten”. Algemene Toelichting di articulo 13 ta hopi cla. “Een instelling informeert de CBA onverwijld binnen “TWEE WERKDAGEN” schriftelijk omtrent een incident”. Pues e incidentenan aki tuma luga na 2013 y con por ta posibel cu ningun hende sa nada?
E preguntanan na diferente instancia pa transparencia y claridad:
Banco Central ta promove masha hopi integridad y transparencia. Banco Central a ricibi un “schriftelijke incident melding” den e caso di e transferencianan di 50 mil dollar cu a bay riba cuenta di Mike Eman den pleno campaña? E banco cu a ricibi e transferencianan aki a lanta un “red flag”? E banco a pidi Mike Eman manera tur otro persona normal pa yena e formulario di MOT? MOT a “red flag” e transaccionnan di placa preto y laba cu tabata drenta riba e cuenta di Mike su fundacion? Banco Central a entrega keho na Ministerio Publico? Pakico no? Unda nos sistema a faya? Ken a sconde of ta tapando pa Mike Eman? Ken a pone man “willens en wetens” riba Mike su cabes? Ministerio Publico a ricibi un keho oficial dia 3 di juni 2020 y na varios ocasion nos ta puntrando si a actua riba e caso. Mike Eman por pasa “screening”? Con por ta posibel? Nos lo amplia den e dianan nos dilanti riba e tema aki.
