Durante conferencia di prensa dialuna ultimo, Parlamentario Endy Croes a elabora riba diferente proyecto deportivo di Gabinete Wever – Croes II cu ta tumando luga, unda cu a señala cu siman pasa a inaugura e luznan LED ultramoderno na veld di Estrella y dialuna anochi a cende e luznan nobo na veld di Dakota. “Mi ta gradici Minister Dangui Oduber cu ta perminti mi yuda y coordina e proyectonan aki”, Parlamentario Croes a expresa. Despues lo continua cu veld di San Luis, Sportboys y Tanki Leendert. Den luna di april / mei cinco (5) otro cancha deportivo lo wordo ilumina. Na e momento ey, e gobierno di turno lo celebra e logronan di Gabinete Wever – Croes II. Palabra di pabien na S.V. Estrella y S.V. Dakota. Tambe diabierna ultimo, a haci e “groundbreaking” y a pone e prome piedra pa e dak riba e tereno Deportivo na IBiSA Sport Centrum na San Nicolas. Desde aña 1982, cu el a habri e peticion y deseo aki tabata tey y nunca el a haya atencion. “Nos a pone e prome piedra pa fase 1, cual ta e dak. E di dos (2) fase di e proyecto a wordo entrega pa e dak banda pabou pa alivia y trece sombra pa nos hoben- y grandinan activo, federacion, hoben den bario y e scolnan den bisindario cu haci uzo di e facilidad aki. Por ultimo, palabra di pabien na deporte cu a ricibi su luga, ayudo y sosten di, entre otro Lotto pa Deporte y Gabinete Wever – Croes II den su totalidad.
