E proyecto ambicioso di luz LED ta continua na veld di S.V. Estrella unda diamars ultimo, a baha e seis (6) postenan di luz pa wordo renoba completamente cu e material di verf “antirust” y “marine” verf ultramoderno. Ademas di esaki, lo instala bracket nobo. Manera ta conoci, fin di luna di december e luznan LED ultramoderno a yega Aruba. Den e prome fase e luznan di un total di cinco (5) veld lo wordo renoba completamente. A inicia na e veld di Dakota, awo ta toca turno na veld di Estrella y den e simannan nos dilanti e trabou ta continua na veld di San Luis, Sportboys y Tanki Leendert. Un vision y decision di Gabinete Wever – Croes II, cual a inicia na luna di juni di aña 2024, unda cu a percura pa order e luznan LED pa e prome (cinco) 5 veldnan. Na inicio di e aña aki ta order otro cinco (5) set y e ultimo order ta tuma luga den e di dos mita di 2025. Ta premira cu lo finalisa cu e proyecto aki den aña 2026. “Mi ta gradici mi colega Minister di Deporte Dangui Oduber pa continua cu nos vision y pa duna mi e oportunidad pa sigui guia e proceso di e bunita proyecto aki. Alabes nos ta gradici Lotto pa Deporte cu ta sosteniendo e proyecto aki den totalidad. Nos hobennan y e deporte rey di futbol ta e gran ganador. Tambe, mi ta gradici mi colega Parlamentario Edgard Vrolijk cu semper a duna su sosten na deporte y na e Proyecto di Luz LED. E proyecto aki ta forma parti di e 4D (Deseo, Disciplina, Dedicacion y Determinacion), cual ta nos compas y inspiracion pa logra bunita proyecto na beneficio di comunidad. Pabien Santa Cruz, pabien nos atletanan, pabien Estrella y pabien na deporte di futbol. Nos pasion pa deporte ta keda intacto ni kico cu pasa. Nos a priminti y nos ta cumpli”, Parlamentario Endy Croes a conclui.
