Parlamentario Endy Croes a tuma nota cu Minister President Mike Eman a anuncia oficialmente su retiro como Lider di AVP pa september 2026, y como Minister-President pa 1 di januari 2027. Un anuncio cu, segun tur indicacion, a cay como un baño di awa friu pa su mes coalicion. Manera minister Gerlien Croes mes a confirma publicamente e anuncio aki no tabata uno consulta. Ni cu FUTURO, ni cu su propio Partijraad. Un Minister President ta anuncia su salida sin un plan, sin un sucesor, sin coordina cu su partners. Esaki no ta entrega un legado. Esaki ta abandono di responsabilidad.
E forma di e anuncio ta solamente e mitar di e storia. Loke ta preocupa Parlamentario Endy Croes ta e contraste cu loke Mike Eman mes a para y defende den publico.
Na juli 2014, Mike Eman a drenta welga di hamber. El a campa dilanti Fort Zoutman, dilanti di Gabinete di Gobernador, pasobra Rijksministerraad a manda un aanwijzing na Gobernador pa no firma e presupuesto di Aruba. E debe di Aruba tabata subi drasticamente bao su mes gobernacion, e deficit di 2014 tabata 443 miyon florin, y Hulanda tabata exigi control. Mike Eman a bisa NO. El a para publicamente. El a duna su palabra na pueblo di Aruba.
Awo nos mester recorda tambe con Mike Eman a yega na e punto ey. Desde cu el a asumi gobernacion na october 2009, su prome presupuesto pa 2010 ya tabata tin un deficit grandi. Aña tras di aña, 2011 y 2012, e deficit a keda crece. Tanto Raad van Advies como IMF a manda señalnan fuerte durante 2013, indicando cu e debe nacional di Aruba tabata aumentando demasiado rapido y drasticamente. Na maart 2013, Mike Eman mes a firma e “Witte Donderdag Akkoord”, Protocol 2013, comprometiendo Aruba pa baha su debe. Pero e presupuesto di 2014 a presenta un deficit di 443 miyon florin, aproba pa su mes parlamentarionan den Staten. Esaki ta e mesun situacion cu despues a conduci na e famoso welga di hamber.
Awe ta 2026. E mesun Mike Eman aki ta forsando su parlamentarionan pa vota “voor” pa Rijkswet HOFA. Un ley cu ta pone Aruba bou di exactamente e tipo di toezicht financiero di Hulanda cu el a yama “verkrachting” 12 aña pasa. Esaki mientras e mes ta bahando di e barco, sin un plan, sin un sucesor nombra, laga su coalicion deal cu tur e consecuencianan.
Parlamentario Endy Croes no por compronde e actitud di Mike Eman pa cu Hulanda awo. Den 2014 el a usa e palabra “verkracht” pa defende autonomia di Aruba. Den 2026 e mes lider ta entregando e mesun autonomia den man di Hulanda y ta bula afor di e barco laga boso deal cu e Hulandesnan. Parlamentario Endy Croes ta expresa cu e decision politico di entrega Aruba su autonomia financiero na Hulanda, via un Rijkswet cu e mes a compara cu “verkrachting,” mientras e ta anunciando su salida sin un plan di transicion, ta algo cu pueblo di Aruba mester compronde y evalua pa su mes.
Mike Eman a bolter 180 grado. Pueblo di Aruba tin un solo pregunta pa haci: entre 2014 y 2026, kico exactamente a cambia pa Mike Eman? Pasobra pa Aruba, e necesidad di proteha nos autonomia, absolutamente nada a cambia.
Fuente di uitspraak Mike Eman:
https://nos.nl/artikel/673801-premier-aruba-in-hongerstaking
https://nos.nl/artikel/2058634-nederland-zat-fout-in-conflict-met-aruba-over-begroting
