Mike Eman cu Benny Sevinger a hinka 44 miyon destina pa school den tram

Parlamentario Endy Croes cu asombro por a tuma nota di un show politico cu Mike Eman a arma ayera dilanti Juliana School y Beatrix School. Mike Eman hunto cu activistanan di AVP tanto algun x docentenan y x directuernan tur cu pensioen “berde di mes” a haña di ta bon pa hunga cu sentimento y inteligencia di pueblo pa cu e dos schoolnan ariba menciona.

A para dilanti e edificionan pa hunga cu emocion:

Mike Eman hunto cu e periodista(nan) cu Mike a paga 8 miyon florin durante 8 aña di AVP pa propaganda gobierno, a sinti e nesecidad pa monta un show. Asina Mike a cana kibra cu 4 x docente kendenan tur x candidatonan riba lista di AVP y algun otro activista. Mike a sinta gaba cu e atencion y amor y e manera di duna les di e x maestronan. Di acuerdo cu Mike e amor grandi y dedicasion di e x-maestronan, awe pensionadonan ta refleha con bon enseñansa tabata ta. Indirectamente criticando e maestronan di awendia. Ojo maestronan! Mike Eman criticando e hecho cu ambos school ta den mal estado y ta sinti cu e edificio monumentalnan aki ta bay perdi.

Mike Eman no a splika cu ta Mike y AVP mes a sera e schoolnan:

Mike Eman no a splika esnan “berde di mes ” cu a compañe cu ta bou maneho di Mike Eman y AVP y ta durante gobernacion di Gabinete Eman 2 ambos school a wordo sera. (Adhunto un recordatorio artikel di Bon Dia Aruba di november 2014). Esaki ta e puro berdad cu Mike Eman “himself” tabata na mando momento a laga sera e schoolnan aki. Mike Eman no a hasi net net nada pa traha un plan pa renoba e schoolnan aki. Na 2017 momento pueblo a core cu Mike Eman e gobierno nobo no a encontra ningun plan of proyecto pa cu e dos edificionan aki. Mucho menos placa reserva pa renobanan. Nos a hereda un Mega Debe di mas di 3500 miyon florin cu Mike a presta den 8 aña. A hereda interes na balor di 232 miyon pa aña cual ta igual na 640 mil pa cada dia cu mester wordo paga riba placa cu Mike a presta. A hereda 82.7 miyon pa paga pa proximo 20 aña na PPP proyectonan. A dal den recibo di fiesta di Mike su cumpleaños di Afl. 142 mil riba un solo anochi 1 di september 2017. Nos a hereda robonan di tereno ( Avestruz) y awe ta hopi Avepista a cay sera. Nos a hereda crisis social y asina por sigui nombra.

Mike y Benny a hinka 44 miyon di school den tram:

Lokual Mike Eman a lubida di conta pueblo ta cu el a ricibi 44 miyon florin ( for di MEP na 2009) destina pa traha schoolnan nobo. Mike Eman y Benny Sevinger a dicidi di cambia e destinacion di 44 miyon aki. A dicidi di cumpra street cars y traha un tram den Caya Betico Croes. E desicion aki a perhudica hopi comerciante kendenan a bati bancarota. Alaves e desicion aki a perhudica hopi alumno cu a keda sin nan school. Cu e placa aki sigur por a renoba Juliana School y Beatrix School. Lamentablemente Mike Eman y AVP a dicidi pa sera dicho schoolnan durante 2014 y a escohe pa ranca 44 miyon for di schoolnan tira esaki den un Tram cu Street cars. Ki ora Mike y AVP lansa un mentira nan mester por sa cu contesta cu documentacion lo bin den nan direcion. Finalmente ta pidi tur hende keda trankil paso aunke nos ta pasando den duro e edificionan aki lo yega na turno pa wordo renoba.

LEAVE A REPLY

Please enter your comment!
Please enter your name here