Parlamentario Endy Croes ta rechasa masha hopi e actitud infantil di Muzaninn Wever kende tin apenas 70 voto y nos sistema democratico a brind’e oportunidad un rato pa sinta den e stoel como Vice presidente di Parlamento di Aruba.
Tin un proceso ora un ley drenta Parlamento
Momento cu un Ley drenta Parlamento e tin un proceso cu mester cumpli cune. Na prome lugar e Ley mester wordo “ingeboekt” den sistema y despues administratie ta mail esaki pa tur 21 Parlamentario. Despues Presidente di Parlamento of e Vice Presidente (ora e Presidente no tey) ta yama un reunion di Centrale Commissie (CC) unda tur Fraccion lo tin representacion den sala grandi pa discuti y dicidi hunto un fecha (deadline) cu Parlamentarionan por haci preguntanan por escrito entre otro na gobierno alrespecto e ley. Hopi biaha e Presidente ta propone un deadline y/of ta yega hunto na un middenweg cu mayoria ta carga. Normalmente ta bay di acuerdo cu un tempo di 2 of maximo 3 siman cual ta rasonabel. Tambe ta masha usual cu ora un ley drenta tras di merdia y wordo ingeboekt semper ta yama e reunion di CC e siguiente dia si agenda permiti of e otro dia siguiente. Pues nunca ta core yama esaki e mesun atardi. Parlamentarionan tin varios reunion nan ta atende hopi biaha pafor di kantoor tambe y/of como Fraccion ta bishita instancianan.
Muzanin kier pasa pa “Wonder Women” a actua slordig y hopi di mala fe
Kico a pasa diamars ultimo? Tras di merdia a drenta un ley esta e presupuesto supletorio y pa ta exacto 2:16pm esaki a wordo ingeboekt na Parlamento. Despues pa 2:21 pm a mail e Ley pa tur Parlamentario. Mientrastanto Presidente Marlon Sneek kende mainta tabata na trabou a sali merdia pa Panama pa Reunion di Parlatino. Pues Vice Presidente Muzaninn Wever di Futuro a takeover. Net 12 minuut despues di a mail tur Parlamentario e ley exactamente 2:33pm Muzaninn Wever ta manda yama un reunion di comision central ( CC) cu lo cuminsa 3:30 pm pa trata fecha di cual lo bira e deadline pa haci pregunta riba e ley cu a caba di drenta. E ley no tin asina tanto urgencia y Muzaninn por a yama e reunion aki e siguiente dia y asina garantisa cu tur Parlamentarionan ta altante di e reunion y por ta presente. Unico splicacion ta cu Muzaninn a haci esaki cu mal intension purbando pa sorpresa oposicion pa oposicion no alcansa yega e reunion. Muzaninn kende sigur no tabata tin nada otro den su agenda y a caba di “take over” e batuta for di Marlon Sneek kier a hunga e rol di “Wonder Woman”. Muzaninn Wever kier rush e ley aki pa december e por bay cas mas tempran cu reces.
Muzaninn Wever no a logra su obhetivo
Muzaninn Wever kier a “please” gobierno pa gana tempo y schakkel uit Fraccion di MEP pero a dal su dede. Fraccion di MEP, cu si ta traha y tin agenda yen, tabata den otro reunion. Asina mes coleganan Evelyn Wever Croes y Hendrik Tevreden a disculpa nan mes y a core sali pa bay atende e reunion di Comision Central yama contra tur regla y etica. Muzaninn a keda sorprendi cu presencia di Fraccion di MEP den tempo record. Muzaninn su proposicion tabata ta pa ningun Parlamentario haci pregunta y manda esaki como “Blanco Verslag” pa gana tempo y ta exactamente locual nos a pensa. Un documento di 38 pagina cu a caba di drenta Muzaninn kier “bulldoze” y a desea pa henter Parlamento di Aruba keda sin haci pregunta? Pa e rason aki Muzaninn y Futuro kier Rijkswet HOFA y entrega nos autonomia na Hulanda? Muzaninn cu Futuro kier pa Hulanda haci pregunta y haci e trabou cu abo a manda nan haci? Foei Muzaninn bo ta cobra salaris di e pueblo aki pa bo mes haci e trabou pa controla gobierno. Fraccion di MEP a protesta y finalmente a gana e bataya unda Parlamentarionan ta haya 7 dia esta un siman pa repasa e documento y haci preguntanan nesesario. Parlamentario Endy Croes ta termina bisando lo siguiente “Si bo NO kier traha den Parlamento anto bay bende payet!”
