Parlamentario Endy Croes na su salida pa reunionnan di Tripartiet y IPKO na Hulanda a expresa cu e ta hopi preocupa cu e maneho di e minister actual Gerlien Croes. No solamente Gerlien ta hiba un maneho di “micro management” pero tambe ta modeshow sin ningun logro propio y ta creando chaos tanto den deporte y den enseñansa. Goberna no kiermeen solamente “post” y saca potret. Goberna ta vision a corto y largo plazo y tuma accion y desicion pa ‘make things happen’. Stadion GPT Dakota ta un ehempel berdadero y concreto cu e minister actual no ta apto y ta debil pa cu su maneho. Desde maart 2025 e LED Screen di 5 meter super grandi y moderno a yega Aruba y net gobierno a cambia. Lotto pa Deporte a presupuesta esaki pa cu instalacion. Tabata tin compania kla pa cuminsa cu instalacion. Minister a drenta para tur trabou sera e stadion coy e yabi hibe su kantoor. Kisas pa repudio? Kiko el a gana? Net Net Nada! Te cu awe minister no a percura pa laga instala e Led screen y a prefera di laga un aparato asina moderno bay atras sin wordo instala. Pa locual ta trata atletiekbaan mester yena e bakinan di ‘long-jump’ cu santo pa nan por wordo usa. No ta nada di otro mundo pero aki tampoco tin boluntad. Den ‘overdracht’ a laga un lista di cosnan chikito cu mester wordo termina y Lotto tin 200 mil reserva y aproba den su presupuesto 2025 pa esakinan. Atrobe e minister pa su inabilidad y ‘micro management’ mester a laga traha un rapport cu a dura lunas pa e experto di su escogencia bise cu e trabounan cu falta lo sali rond 180 mil florin. Mas tristo e no a hasi net net nada cu e rapport aki paso te cu awe trabounan no a continua. No tin ‘leadership’ y no tin vision. Nos lo manda preguntanan via Staten pa Gerlien pa asina purba comprende dicon e no tin boluntad. Kisas e ora e lo cuminsa traha. El a biaha 5 dienstreis den prome 6 luna di trabou manera serefina den jet. Kisas esaki por a strob’e? Gobernacion ta continuacion y Futbol y Athletiek mester nan stadion. Lo aprecia pa e minister concerni duna atencion pa termina esaki.
Salaris di Docentenan no ta 34 miyon manera Gerlien a gaña:
Un otro grupo cu ta sufriendo bou maneho di Gerlien ta enseñansa. Desde October 2023 den Ministerraad a tuma un desicion pa forma un comision pa revisa e structura di salaris di docentenan. A inclui expertonan den tereno di enseñansa hunto cu SIMAR pa asina por ta sigur cu e conseho final ta wordo carga pa e veld. Desde april/mei 2024 a ricibi e advies final cual a wordo manda pa DRH. Gabinete Wever Croes 2 a laga 500 miyon florin atras di surplus. Gerlien ta drenta gobierno y corta 2.9 miyon den enseñansa na maart 2025 ora a trata presupuesto di aña 2025 y den presupuesto supletorio na augustus ultimo Gerlien a bolbe corta structuralmente 3 miyon den salaris di fundacionnan. Den Parlamento Gerlien a grita y a “gaña” atrobe cu e aumento di salario di docente lo costa caha di gobierno 34 miyon pa aña. Un mentira flagrante. E aumento lo costa 11 miyon structural pa aña y ta encera varios cambio cu SIMAR ta carga. Gerlien por puntra SIMAR den e reunion programa pa 25 di september. Gerlien ta sali publica cu apenas 5 miyon di e 500 miyon surplus cu Gabinete Wever Croes 2 a laga atras su persona y Geoffrey Wever a presupuesta pa salario di docentenan pa aña 2026 enadelante. Esaki ta un bofta den cara di e docentenan. Pues ta drenta gobierno corta 6 miyon y kier duna 5 miyon bek! Gerlien Croes ta blasfemia y ta burlando di henter e veld di enseñansa. Nos ta lamenta esaki masha profundo paso nos ta kere ‘fervientemente’ cu enseñansa y sigur e docentenan merece un trato mihor.
