Parlamentario Endy Croes ta siguiendo hopi di serca e desaroyo di Merca y Venezuela pa locual ta trata petrolio. Dia 9 di Januari ultimo Presidente di Merca Donald Trump a invita 17 companianan di mas grandi den mundo petrolero pa un reunion na White House. Topico tabata inversion biyonario pa aumenta produccion di petrolio di Venezuela. Por mira atras riba un tremendo reunion cu un apitit hopi halto di companianan renombra.
Un inversion inicial di 100 BIYON USD dollar
Companianan manera Chevron ( cu ta na Venezuela caba), Exxon Mobile kende desde 1940 tabata na Venezuela pero tin 20 aña cu e regimen Chavez/Maduro a desapropia tur cos di nan y saca nan di Venezuela, Conoco Phillips kendenan a wordo cori di Venezuela a bisa Trump cu nan a laga atras y perde 12 Biyon us dollar na ekiponan y asina por sigui menciona storianan real pero amargo. Den e invitadonan tambe tabata presente CEO di Trafigura Sr. Richard Holtum. Trafigura ta e compania cu a caba di gana un “tender” pa entrega gasolin, diesel y jetfuel pa Aruba pero te cu awor no a wordo honra pa RDA/FMSA. Croes a sigui e reunion di Trump cu hopi atencion y por mira e interes ta hopi grandi den e companianan multi biyonario pa hasi inversionnan biyonario na Venezuela.
Trump a splica hopi cla:
Trump a bisa e companianan hopi cla y ‘straight forward’ cu bosonan lo hasi inicialmente 100 Biyon us dollar di inversion pa drecha y restructura henter e infrastructura di petrolio na Venezuela cu e obhetivo pa aumenta e producion. Tanto e companianan lo saca nan placa bek y gana placa, gobierno Venezolano mester haña su ‘fair share’ pa su hendenan di Venezuela y gobierno Americano lo hanja su ‘share’. Por ehempel presidente Trump a accentua cu tur materialnan pa cu e inversion mester wordo cumpra na merca. Trump a bisa tambe cu e ta habri pa bende petrolio cu China y Rusia pero na prijs di mercado. Trump a splica alcambio Merca lo percura pa e siguridad (safety) pa e compania y su trahadornan na tera mientras hunto cu gobierno Venezolano lo percura pa hasi e cambionan nesesario den e structura comercial actual y leynan di hydrocarbon. Trump y su team di energia ta “dead set” pa logra esaki y companianan a expresa hopi interes y apetit.
Oportunidad ta bati 1 biaha na Bo porta
Parlamentario Endy Croes ta sigui splica cu e situacion cu a pasa na Venezuela 3 di januari ultimo unda merca a saca Nicolas Maduro y ta trahando di serca cu gobierno di Venezuela pa logra e cambionan grandi den e fase di transicion ta cambia henter e panorama petrolero no solamente pa Venezuela pero pa Aruba y Curacao y henter region. Aruba por ehempel ta enbusca di un di dos pilar economico cual por yuda nos pais reduci e debe nacional mas liher y crea oportunidadnan di inversionnan grandi, empleo, placa adicional pa caha di gobierno, aumenta nos GDP y un bida briyante pa nos hendenan y sigur pa area di San Nicolas . Ta e momento oportuno pa e gobierno di turno “stand up” cu un vision concreto riba e tema . Mester bin un decision rapido pa explora hunto cu e companianan cu lo bay inverti 100 BIYON USD dollar e rol di refineria di Aruba y Curacao tanto den storage y refina producto. Berdad e refineria di Aruba por ta deteriora na e momento aki pero mescos esnan na Venezuela ta y e infrastructura ayanan tambe lo wordo renoba segun expertonan a papia di un mix di renoba un parti y trece otro ekiponan ‘up to standard’. Parlamentario Endy Croes ta pidi gobierno atende esaki cu tur seriedad sin mira color politico y lo pidi un reunion publico pa hiba e discusion aki den Parlamento. E siman aki Croes lo manda un carta pidiendo un reunion publico pa hiba un debate riba e tema aki. Ban sirbi e interes general riba e tema aki cu urgencia.
