Parlamentario Endy Croes ta felicita partido MEP cu su 55 aña di existencia. Dialuna awor 9 di Februari 2026 partido MEP ta cumpli 55 aña cu el a wordo funda. Partido MEP ta un partido di un trayectoria amplio cu logranan grandi y awe nos lo repasa poco historia di e tercer (3) Lider di MEP Evelyn Wever Croes kende a dirigi MEP desde Augustus 2011 te cu awe. Betico Croes a dirigi MEP pa 15 aña desde 1971, Nel Oduber a dirigi MEP pa 25 aña y Evelyn Wever Croes a lidera MEP desde 2011 te cu awor pa un total di 15 aña. Esaki ta e (3) Lidernan cu a Lidera MEP den su 55 aña di existencia.
MEP a wordo funda 9 di Februari 1972
Dia 9 di Februari 1971 e Lider inmortal Betico Croes den presencia y cu aprobacion di Lidernan di Bario di tur skina rond Aruba a funda e partido MEP (Movimiento Electroral di Pueblo) cu e ideologia social democrata. E desicion di 9 di februari 1971 a wordo ratifica durante e prome Congreso di MEP cu a tuma lugar diadomingo 14 di Februari 1971 den teatro Rialto na Playa. E prome directiva di MEP tabata consisti di Lider y Presidente di directiva e architecto di nos Status Aparte Betico Croes y miembronan di directiva tabata Efrain de Kort, Watty Vos, Daniel Leo, Jossy Croes, Sixto Feliciano y Cezare Terzano.
Evelyn Wever Croes ta bira e di 3 Lider di MEP 28 di Augustus 2011
Partido MEP a organisa su Congreso di acuerdo cu su Statuut, 28 di Augustus 2011, pa asina eligi un Lider nobo pa e partido MEP. Den elecion aki (3) candidato a wordo postula unda Evelyn Wever Croes a gana na un forma amplio y a wordo eligi como e Lider nobo di MEP. Asina MEP ta sera conoci cu su di tres (3) Lider den su historia y pa prome biaha un Lider Femenino. Desde 2015 enadelante Evelyn Wever Croes a wordo re-eligi na varios ocasion unanimamente. Evelyn a hiba un oposicion fuerte y den eleccion 22 september 2017 MEP ta logra 20.061 votos cu ta representa 37.6% di electorado bon pa 9 asiento y ta forma gobierno cu partido POR y RED.
Evelyn Wever Croes ta bira e prome Minister Presidente femenino
Despues di eleccion di 22 di september 2017 unda partido MEP a saca 9 asiento, MEP a forma gobierno cu partido POR (2) asiento y partido RED (1) asiento. Evelyn Wever Croes ta huramenta 17 di november 2017 como Promer Minister di Pais Aruba. Evelyn Wever Croes ta bay den historia como e prome Minister Presidente Femenino di Pais Aruba. Pa MEP esaki sigur ta un honor.
Evelyn Wever-Croes: Determinacion y curashi den temponan dificil
Evelyn Wever-Croes a demostra di ta e lider cu vision y determinacion ora el a asumi mando di un Aruba financieramente kibra pa motibo di e mal maneho di AVP. Cu man firme, el a transforma deficitnan den surplus, stabilisando nos economia te ora e pandemia a presenta un reto sin precedente. Como un lider confiabel, Evelyn a guia Aruba den e pasonan mas scur di COVID-19 y a bringa batayanan duro contra condicionnan dragonico di Hulanda, logrando kita e ley nan di COHO y RAFT for di mesa. Danki na su capacidad, Aruba no solamente a recupera, sino a rebound mas fuerte, confirmando cu Evelyn ta e unico lider cu e curashi pa proteha nos autonomia y hiba nos pais dilanti. Cu Evelyn liderando e pais aki ta e prome biaha den 40 aña desde nos Status Aparte cu pais Aruba aa conoce Surplus pa 3 aña consecutivo.
Evelyn Wever Croes ta logra haci MEP e partido di mas grandi
Evelyn Wever Croes ta Lidera MEP na un victoria 25 di juni 2021 logrando 20.700 voto bon pa 9 asiento y ta hasi MEP e partido di mas grandi bek. Alabes Evelyn Wever Croes ta bira e votegether di Aruba cu 7518 voto personal. Entre otro esaki sigur ta un reconocemento di gratitud pa e magnifico trabou cual Evelyn a desplega durante Pandemia (Covid 19) pa su pais Aruba. Den eleccion di 6 di december 2024 Evelyn Wever Croes ta bolbe sali votegether di Aruba pa di dos biaha consecutivo cu 6474 votos. Pueblo ta keda expresa nan confiansa den e Lider Femenino di MEP.
Fundeshi di digitalisacion den enseñansa
Enseñansa ta cay hopi cerca na curason di Lider di MEP y ex Promer Minister di Aruba Evelyn Wever Croes. P’esey Evelyn a percura atraves di FUTURA pa pone e fundeshi di digitalisacion creando fondonan adicional pa inverti den varios proyectonan digital cu cada scol mes tabata presenta. Banda di esaki e proyecto di digi-board cu Evelyn a duna e impulso tambe ta uno exitoso.
Evelyn Wever Croes 15 aña como Lider di MEP
Evelyn Wever Croes den luna di augustus 2026 lo cumpli 15 aña como Lider di MEP. Sigur un tarea cu no tabata facil pero cu pueblo di Aruba a sa di brasa y aprecia. Danki Evelyn Wever Croes pa tur Bo trabounan desplega como Lider di MEP y como Minister Presidente. Danki na tur sostenedornan cu a haci esaki posibel. Un danki special na bo casa y yiunan y henter famia cu a sostene bo den esaki. Aruba y MEP ta orguyoso di bo!
