Diaranson y diabierna ultimo Parlamento a trata e ley Landsverordening bestuursrechtelijke Handhaving van de Consumentenbescherming. Ta trata di un ley firma pa Evelyn Wever-Croes, pues di Gabinete Wever Croes II cual finalmente despues di a cana ful e trayecto a yega Parlamento pa wordo trata. Minister Geoffrey Wever ta esun encarga pa defende e ley aki y mester a contesta preguntanan di Parlamentarionan.
Kico precies e ley pa proteha consumidor ta encera?
E concepto di Landsverordening bestuursrechtelijke handhaving consumentenbescherming esta e ley pa proteccion pa consumidor ta pa proteha interes di nos cuidadanonan door di trece esaki bou di un Autoridad cu pa ley por actua contra comerciantenan cu no ta cumpli cu reglanan y asina e Autoridad por duna instruccion, y si no cumpli e Autoridad por duna boet y dwangsom pa asina corigi cierto comportacion. Esaki finalmente lo garantisa e level playing field. Mediante un ley anterior Mededingingsverordening (ley aki a tackle e monopolio) den articulo 4.1 inciso 1 a brinda e posibilidad pa bin cu e Autoridad. E Autoridad tey caba awor y yama AFTA Aruba Fair Trade Authority), cual lo percura pa mas regulacion pa comerciantenan, na cual nan mester atene nan mes cu beneficio final pa e consumidor. Pues e competencia husto y e proteccion di e consumidor lo wordo sirbi cu e ley aki.
Un ehempel chikito, si abo cuidadano cumpra un TV, Radio, hero di strika y den algun siman of luna e aparato a kima of daña, ta e deber di e comerciante pa por duna bo un nobo, sin cu bo mester cera un seguro adicional ora bo a cumpra esaki. Awor caba den Ley Buki 7 di Codigo Civil bo tin 6 luna di garantia, cu kisas hopi hende no ta na altura. Pues bo por entrega keho contra comportacionnan asina awor en adelante na e Autoridad ( AFTA) kende lo actua den bo nomber contra e comerciante. Lo contact e comerciante pa corigi su comportacion. E comerciante na final por ricibi un boet di maximo 100 mil florin y si e comerciante tin omzet di mas di 1 miyon florin e boet lo bira 10% di esaki. Riba su mes un tremendo ley cu a inicia bou Gabinete Wever Croes 2 y cu awor a logra wordo aproba den Parlamento di Aruba den un forma unanimamente diabierna ultimo.
Geoffrey Wever a mustra hopi zwak!
Durante presentacion di e ley Parlamentarionan a haya e oportunidad pa haci hopi pregunta. Aunke ta un ley cu a wordo traha bou signatura di MEP e Fraccion di MEP a haci avalancha di pregunta. Por a tuma nota e falta total di experencia di Parlamentarionan di coalicion pa por a debati riba e ley y sirbi e pais na un manera digno. Como cu Futuro tambe a campaña cu nan lo percura pa mehora poder di compra di cuidadanonan y tambe baha costo di bida y esaki ta ancra tambe den Acuerdo di Gobernacion 2025-2028 y e ley cu a wordo trata tin raakvlak cu e temanan, Parlamentarionan di MEP a puntra Geoffrey Wever varios pregunta al respecto. Hopi ta cuidadanonan cu ta acerca nos cu prijsnan a sigui aumenta drasticamente ultimo lunanan manera prijs di lechi, coffee, galiña y sigur di construccion. Geoffrey Wever sinembargo a splica Parlamento cu informacion cu e tin y ta admistra cu prijsnan hustamente a baha drasticamente y pueblo awor ta kedando cu mas placa den su saco. Nos a haya e contesta aki un “burla” contra inteligencia di Pueblo mirando cu tur caminda nos cana e reclamo ta bin dilanti. Ta ilustra si cu Geoffrey Wever y Futuro ta desconecta totalmente cu e realidad. Na final por bisa cu Geoffrey Wever tabata hopi zwak den su presentacion na Parlamento diaranson y diabierna ultimo.
