Diamars ultimo, Parlamento a trata e presupuesto di DOW pa aña 2026 den un session extensivo. E reunion publico a inicia pa 9’or di mainta y a termina rond di 10’or di anochi. Minister Baba Herde a pasa 13 ora den Parlamento defendiendo dicho presupuesto, cual finalmente a keda aproba despues di hopi dolor di cabes. Na final di e reunion publico, Minister Herdé a bandona sala di Parlamento bastante soda y e tabata mustra hopi cansa.
AVP a suta su propio minister cu 6 mocion
Durante e reunion, a tuma nota cu tur Fraccion a presenta mocion. Un total di 10 mocion a wordo presenta, di cual dos (2) tabata di MEP y dos (2) di PPA. Loke tabata incomprendibel ta cu e propio Coalicion AVP-Futuro a suta nan propio minister cu 6 mocion. Esaki ta e prome señal pa Minister Baba Herdé cu e parlamentarionan di AVP kier mira hopi cambio den e presupuesto y cu nan no ta di acuerdo cu e manera cu esaki a wordo presenta na Parlamento. Por ehempel, tin solamente 3.5 miyon pa asfalta caretera durante aña 2026, mientras cu MEP a laga 18 miyon aproba bou di un “Masterplan di DOW”, cual tabata identifica tur e careteranan cu mester a wordo asfalta of drecha durante aña 2025. Croes a splica cu gobernacion ta un continuacion y no pasobra gobierno a cambia, mester a para e proyectonan aki. Lamentablemente, e escogencia di AVP-Futuro durante aña 2025 tabata diferente, ya cu nan a opta pa traspasa e 18 miyon den e fondo di inversion pa realisa otro tipo di proyecto. Consecuentemente, mas di 400 dia a traspasa y Gobierno no a asfalta ni un “hanchi” ainda. Den sala di Parlamento a bira evidente cu e situacion aki a genera preocupación cerca varios miembro di e mesun coalicion.
AVP a presenta un mocion di desconfiansa
AVP a presenta un mocion cual MEP ta considera como un mocion di desconfiansa contra nan propio minister. “Mas claro no canta un gallo”: e mocion aki a laga Minister Baba “babuca”. Den e mocion number dos (2) aki, e propio fraccion di AVP a splica cu e presupuesto di DOW no ta contene un bista cla y completo di e proyectonan concreto pa aña 2026. No tin un conexion directo y visible entre e gastonan asigna y e proyectonan especifico, locual ta stroba Parlamento di ehecuta su tarea di control riba gastonan publico debi na e falta di informacion (indirectamente AVP ta bisa aki cu Baba ta sconde cos). Kisas Minister Baba tabata kier men cu el a bin pa “bolter cos”, pero e mocion di AVP ta termina urgiendo Gobierno pa, den un periodo di 30 dia, presenta un bista specifico di tur proyecto plania pa DOW den 2026. Alabes, AVP ta exigi pa e minister indica claramente e presupuesto asigna, e meta y e fecha di inicio di cada proyecto cu gobierno tin pensa di realisa durante aña 2026. Esaki tabata un mocion “candela” pa Minister Herdé biniendo for di su mesun partido, locual sigur por wordo interpreta como un mocion di desconfiansa. E mocion aki a wordo aproba pa tur Fraccion. Maske e ley a wordo aproba na final di anochi, Minister Baba Herde a bandona sala di Parlamento poco tolondra y basta zuur.
