Diasabra ultimo, Aruba a celebra Dia di Rey den un bunita forma. Durante di e ceremonia protocolario a duna reconocemento na hobennan cu ta destaca den diferente areanan na Aruba. Parlamentario Evelyn Wever-Croes a expresa cu e storianan di e hobennan aki ta di gran inspiracion pa nos como adulto sigui haci un diferencia pa otronan den comunidad.
Reconocementonan
- E Copa Hubenil Gobernador Felipe B. Tromp a bay pa Richard Tromp un hoben cu tin su fruteria chikito banda di Centro di Bario Playa Pabou y tin su barberia na cas di su mayornan.
- E premio den categoria Pre Hubenil a bay pa e muchanan di Arubaanse Padvindsters Gilde pa nan dedicacion na formacion di nan mes y trabounan social y boluntario.
- Premio di estimulo a bay den categoria hubenil pa Phelan Tromp y Rashid Perez di Grupo Scout San Dominico. Nan a dedica hopi tempo na formacion di nan mes y haci trabounan boluntario. Pa e formacion personal nan a haci un trayecto special bou guia di Hopman Rudolf Angela.
- Den categoria Pre Hubenil e premio di estimulo a bay pa Melaiska Woodley kende ta modela, baila, haci deporte di basketball, atletismo y ta un inspirador pa otronan.
“Mi ta felicita tur e hobennan y organisacionnan cu nan reconocemento bon mereci, y gradici cada un di nan pa bunita trabou cu nan ta haci pa hiba pais Aruba padilanti. Tambe un danki na e mayornan pa e sosten cu nan ta brinda nan yiunan, pa asina nan por cumpli cu nan soño. “E ta dunami un sentimento di hopi orguyo pa mira hobennan inspira otro di e bunita forma aki” Parlamentario Wever-Croes a expresa.
