Siman pasa a habri cu e noticia cu despues di a dura un aña pa forma, e gobierno di Hulanda a cay. Parlamentario Evelyn Wever-Croes ta lamenta e situacion aki mirando cu un caida di gobierno ta trece instabilidad pa un pais. Tambe mester wak awor kico e impacto di e caida aki ta pa pais Aruba.
Parlamentario Wever-Croes a indica cu aunke Parlamento no ta hayando informacion di e gobierno nobo di AVP-Futuro riba e tema di e negosiacionnan cu Hulanda, su persona a haya informacion cu nan ta hopi leu caba y cu e rijkswet ta casi cla. Tambe a haya informacion cu e siman aki un delegacion di 3 á 4 minister lo mester a biaha pa Hulanda pa dialoga cu e gobierno Hulandes riba e tema aki, pero cu esaki a cancela mirando cu no tin un secretario di estado mas. Secretario di Estado Szabó, despues di e incidente aki no solamente a entrega su retiro sino a bandona e cargo tambe. E Minister di Binnenlandse Zaken lo tuma e cartera aki over, pero el lo mester pasa riba e materia prome cu e por sinta negocia cu Aruba, cual lo conduci na un tardansa den e proceso.
Tambe Parlamentario Wever-Croes a expresa cu e ta spera cu nan lo por yega na algo hopi lihe, pero e ta mas preocupa kico e contenido di locual a wordo negocia ta. E ta spera cu parlamento por haya e informacion pronto y cu por bin un poco stabilidad durante e periodo demisionario aki di e gobierno y cu nan por sigui negocia pa keda cla pa asina comunidad por haya sa si Aruba ta bin na remarke pa baha e interes si of no.
Pa loke ta e interes riba e debe di covid, esaki ya caba a subi caba desde 1 di Mei 2025 paso Hulanda ta prefera no sigui traha riba e ley pa mira si nos por yega na otro, y despues cu forsa retroactivo baha e interest te 1 di Mei. Esaki solamente si Aruba cu Hulanda yega na otro. Pa parlamento ta importante pa sa con bo ta sali di un rijkswet, paso un rijkswet ta pidi parlamento pa entrega su decision autonomo na un organo di Reino. Parlamento lo por haci esaki solamente si tin beneficionan interesante pero tambe pa un period defini. Pues ta importante pa sa kico ta e beneficionan financiero cu Aruba lo haya y con lihe Aruba lo por sali afo di e rijkswet.
