Den fin di siman, Parlamentario Evelyn Wever-Croes a atende e conferencia di Tienda di Educacion titula “conferencia di famia di generacion pa generacion”. Durante e conferencia aki, esnan presente por a tende di e profesionalnan kico tur Tienda di Educacion ta ofrece y di tur e servicionan.
Como e unico organisacion local como tambe den caribe cu un liña di telefon (161), Tienda di Educacion ta aporta diariamente na yuda mayornan (voogd) y educadornan cu conseho, guia y sosten encuanto lantamento y criansa di mucha y hoben aki na Aruba. Nan servicionan ta basa riba e vision alinea cu articulo 18 di e convencion di derecho di mucha cu ta reconoce e rol importante di e mayor/voogd y educador den e crecemento, desaroyo y bienestar di e mucha y hoben.
E conferencia di Famia “Di Generacion Pa Generacion” diasabra ultimo tabata tin como meta di mira famianan, educadornan y miembronan den nos comunidad hunto, pa siña y comparti informacion clave na loke ta e vision di sosten pa mayor como tambe criansa y educacion di mucha y hoben na Aruba.
Durante e conferencia, 4 profesional den cuido a duna un presentacion hopi interesante. Antoniette Geerman, Clementia Eugene, Luz Neyla Tromp y Nichole Kock cada un a trece un otro angulo di importancia den compronde y den cria muchanan.
Parlamentario Wever-Croes a expresa cu cria un yiu, nieto, iha of un subrina no ta nada facil, y den casonan necesario e profesionalnan aki di Tienda di Educacion lo por yuda ofrece guia, y contesta cualkier pregunta.
“Masha pabien na Tienda di Educacion pa organisa un conferencia asina importante, y danki pa e invitacion. Ami a siña hopi como profesional, como parlamentario pero principalmente como wela” Parlamentario Wever-Croes a expresa.
