Recientemente Parlamentario Evelyn Wever-Croes a asisti na un conferencia organisa pa e Facultad di Hosptitalidad y Maneho di Turismo di Universidad di Aruba. E tema durante e conferencia aki tabata basa riba e pasado, presente y futuro di turismo.
Parlamentario Wever-Croes a expresa cu e facultad ta celebrando nan di 20 aniversario, y cu
p’e ta un honor pa por mira con nan a desaroya durante e 20 añanan aki, mirando cu su persona tabata parti di e colegio supervisor di universidad 20 anja pasa na momento cu e facultad a lanta. Durante tur e añanan aki, hopi ta esnan cu a logra titulonan grandi na Universidad di Aruba, y awe ta fungi como profesionalnan den e area di turismo.
“Mi ta sumamente orguyoso di cada un di nan, y ohala cu e discusionnan hiba durante e conferencia, tambe por defini e futuro. Importante ta decisionnan cu a wordo tuma den pasado pa Gabinete Wever-Croes, Aruba One Happy Island. Pero pa Aruba ta un isla dushi pa bishita, e mester ta un isla dushi pa biba, y mi ta contento cu den e discurso di tur e oradornan, esaki tabata e liña cora.
Enfasis mester wordo poni riba nos hendenan , pa asina por crea di pais Aruba un dushi luga pa biba. Unabes nos logra esaki, nos por invita nos bishitantenan pa bin den nos hogar y goza tambe di e pida baranca aki y tur loke nos tin di ofrece.
Pabien na Universidad di Aruba cu nan di 20 aniversario. Tambe un pabien na e Senior Year di e facultad di Tourism and Hospitality Management pa organisa e encuentro aki. Mi ta sumamente orguyoso di e studiantenan aki” Parlamentario Wever-Croes a expresa.
MASHA PABIEN NA FACULTAD HTMS DI UNIVERSIDAD DI ARUBA CU CELEBRACION DI 20 ANIVERSARIO
“Tabata un privilegio di por a celebra e hecho aki durante e evento encanta di Fundraising den fin di siman”
Diasabra ultimo e Facultad di Hospitalidad y Maneho di Tursimo a organisa e evento anual di fundraising. Ta trata di un evento espectacular cu a wordo organisa completamente pa e studiantenan di e ‘junior year’. Nan mester a planea cada detaye, y nan mester a traha e anochi aki tambe. Cu ayudo di diferente sponsornan, nan a ofrece e huespednan un anochi di evento espectacular, y cuminda sabroso. E evento aki ta conta como un resultado di examen di e studiantenan.
“Mi tabata parti di e colegio supervisor di universidad 20 anja pasa na momento cu e facultad a lanta, y mi ta honra di por ta awe celebrando cu nan. Durante 20 anja hopi profesional a wordo forma na nos Universidad riba e area di hospitalidad y turismo, y nos ta orguyoso di tur. Y e studiantenan cu awe nochi a converti e universidad aki den un experiencia encanta, sin duda tambe lo bira profesionalnan di cual nos por ta orguyoso.
Mi kier felicita e studiantenan cu a organisa e evento, pa mi nan cada un merece un 10. Mi kier gradici nan tambe pa un anochi espectacular. Finalmente mi kier felicita Universidad di Aruba, facultad FHTMS, cu e 20 anja nan y cu boso por cumpli hopi biaha mas 20 anja”, Evelyn Wever-Croes a duna di conoce.
