Den e dianan aki nos ta scucha parlamentarionan di AVP y Futuro bisa cu ta gobierno di MEP ta responsabel pa e “rijkswet”. Esaki ta incorecto, y ta muestra cu sea nan no conoce historia di nos pais, of nan kier manipula un biaha mas cu informacion.
Con tur cos a cuminsa?
Na aña 2009 Gabinete Nel Oduber 4 a laga e debe di pais Aruba na 45% di GDP, cu un maneho financiero responsabel y transparente. Den apenas 5 aña, Gabinetenan Mike Eman 1 y 2 a redobla e debe, te riba 90%. Esey a causa hopi discusion y problema cu Hulanda, cu a conduci cu Hulanda a pone Aruba bou di un curatela financiero (KB), y a forsa Aruba pa introduci supervision financiero.
E tempo ey Hulanda a exigi pa e supervision financiero bai den forma di un rijkswet. Pero e prome minister di e tempo ey a roga nan pa no haci esey, pa lage den un landsverordening (un ley local), y a priminti nan cielo y tera. Entre otro el’a priminti cu e lo mantene su mes na e normanan financiero den e ley.Esnan cu a firma e acuerdo e tempo ey tabata ex minister Plasterk di Hulanda, y pa Aruba, ex Minister Mike Eman (AVP) y ex Minister Angel Bermudez (fundado di Futuro).
Sinembargo, Mike Eman y Angel Bermudez NO a cumpli cu e palabracionnan cu Hulanda, y nan no a tene nan mes na NINGUN di e normanan financiero cu a keda stipula den e acuerdo. E momento ey, Hulanda a saca e rijkswet bek, y pone riba mesa. Ora cu gobierno a cambia na 2017, y a drenta un gobierno di MEP-POR-RED cu a hiba un maneho financiero solido y responsabel, Hulanda no por a impone e rijkswet mas, y mester a bolbe pon’e den lachi.
Te ora e pandemia a bati na nos porta na aña 2020, e ora Hulanda a bolbe saca e rijkswet y pone riba mesa. Nos a lucha 5 aña largo pa evita cu e rijkswet ta drenta, a traves di strategianan, negociacionnan, deliberacionnan. Nos a logra cu tur rijkswet proponi, CHE, COHO, RAFT, a wordo bari for di mesa.
Sinembargo, ora e rijkswet HOFA a wordo poni riba mesa, nos no tabata den gobierno mas, y e resto ta historia: dia 13 di augustus e gobierno aki a acorda e texto di e rijkswet, sin aprobacion di Ministerraad, ni aprobacion di Parlamento.
Awor ta keda Parlamento e UNICO arma, esey ta di para e rijkswet aki, y manda gobierno bek mesa di negociacion pa logra un mihor deal cu Hulanda.
E recapitulacion di historia aki ta specialmente pa esnan cu no conoce e historia. Semper ta importante pa bo conoce bo historia, pa bo compronde bo presente, pa asina bo por ta exitoso den futuro.
