Fraccion di MEP den Parlamento tabata tin un reunion interesante cu Studenten Commissie Aruba cu ta un comision di studiantenan na Hulanda. E comicion aki a wordo institui door di ex Prome Minister Evelyn Wever-Croes na februari ultimo como un comicion special pa yuda Arubahuis y e studiantenan di Aruba na Hulanda.
Parlamentario Evelyn Wever-Croes a indica cu durante su periodo como Prome Minister di Aruba, el a reuni cu e comicion aki aña pasa maart na Hulanda, y februari 2025 e comicion a wordo instala oficialmente como e miembro di conseho di e studiantenan p ayuda Arubahuis y Gobierno di Aruba.
“Mi ta sumamente orguyoso di e hobennan aki. Nan tin hopi pasion pa yuda na conseha y guia e studiantenan na Hulanda. Ya caba nan a cuminsa inventarisa kico tur lo mester haci pa asina yuda e studiantenan di e miho manera. Por ehempel miho preparacion, y esaki por cuminsa mira caba bou guia di ex Minister Endy Croes cu tabata percura pa e studiantenan ta hopi miho prepara prome nan yega Hulanda. Tambe ta importante pa unabes e studiantenan yega Hulanda, nan tin e guia pa asina por adapta na e luga nobo aki, y percura pa ora nan caba di studia tin trabou pa nan na Aruba. Un iniciativa importante di Gabinete Wever-Croes tabata pa evalua si e “mentor” na Hulanda mester asisti studiantenan pa mas cu solamente e prome aña. E tabata un bon reunion. Mi ta deseanan hopi éxito y gradici cada un di nan pa acepta e reto aki” Parlamentario Wever-Croes a expresa.
