Manera ta conoci e tema di salud mental y adiccion ta un problema grandi na Aruba. P’esey durante gobernacion di Gabinete Wever-Croes a pone hopi atencion na esaki, y a yuda pa asina crea Stichting Hunto, na unda tur e stakeholdersnan y profesionalnan riba e tema di adiccion y salud mental ta traha hunto.
Mirando e importancia di e tema aki, Parlamentario Evelyn Wever-Croes hunto cu coleganan Parlamentario Rocco Tjon y Endy Croes a reuni cu Stichting Hunto pa asina haya un “update” di e trabounan cu tin andando. Stichting Hunto a informa cu nan tin un total di entre 1500 pa 2000 cliente cu ta wordo yuda di cual 300 ta mucha. Cu un total di 64 profesional nan a logra baha e lista y tempo di espera te na 3 luna. Tin hopi mas trabou pa haci pero danki na ayudo di Gabinete Wever-Croes e fundeshi ya ta poni pa asina nan por cumpli cu nan trabounan debidamente.
Parlamentario Wever-Croes a indica cu Stichting Hunto tambe a informanan di e planesnan pa futuro cu ta ensera con pa yuda e adictonan cu ta biba riba caya, stimulando nan pa asina busca e debido ayudo. Un di e proyectonan cu nan tin pa cu esaki ta pa bin cu un unidad mobil na unda representantenan di Stichting Hunto mes lo yega serca e adictonan aki, pa asina duna nan e oportunidad di tuma un baño, laba nan pañanan, haya cuminda, y ofrece nan ayudo y conseho na e momento ey.
“Na fin di dia ta importante pa corda riba tur ciudadano di pais Aruba y nan famianan. E trabou cu Stichting Hunto ta haci ta di suma importancia y nos di fraccion di MEP ta spera cu e gobierno nobo sigui sostene nan. Cada hende merece un oportunidad nobo pa asina logra cosnan grandi den nan bida, y ta via Stichting Hunto nos por yega na tur esnan cu ya no ta mira un speransa” Parlamentario Wever-Croes a expresa.
