Den fin di siman minister presidente demisionario Schoof di Hulanda, tabata na Aruba y hunto cu Minister President di Aruba, a papia di e 100 miyon florin cu Hulanda lo inverti den transicion di energia na Aruba. Esaki ta un palabracion haci na 2023 dianan 10, 11 y 12 di Mei, cu ex Minister Jetten, e tempo ey Minister voor Klimaat en Energie, durante e prome Caribbean Climate and Energy Conference (CCEC).
Despues di esey e ex-Minister Jetten a informa e Voorzitter di Tweede Kamer cu gobierno di Hulanda ta sostene tur 6 isla den nan maneho di energia y pa nos islanan bira un showcase pa demas islanan chikito.E meta di e prome Caribbean Climate and Energy Conference (CCEC) tabata pa haya un mihor bista con Hulanda por asisti e 6 islanan den Caribe den e transicion di energia. “Mi ta hopi orguyoso cu e fondo aki ta bay wordo realisa. E conferencia a wordo organisa riba iniciativa di Aruba y ex minister Jetten. Durante su bishita na 2023, el a elabora cu e paisnan riba e fondo, y a informa cu lo ta entre 100 pa 200 miyon euro pa Aruba, Curaçao y Sint Maarten, y 30 miyon pa Boneiro, Saba y Sint Eustatius.
E fondo mester a wordo incorpora den 2024, pero a sufri tardansa. Den presupuesto di Hulanda 2026, cu a wordo entrega na september ultimo, e fondonan a wordo aloca. Awor tur cos ta cla pa entrante 1 di januari 2026 e proyectonan wordo ehecuta.
Ta hopi importante pa subraya cu e fondo aki a bin disponible SIN RIJKSWET”, Lider di fraccion di MEP Evelyn Wever-Croes a duna di conoce.
Durante Gabinete Wever-Croes 1 y 2 a inverti hopi energia y atencion den yega na un maneho nacional coherente, un National Energy Policy. A logra alinea tur stakeholders na Aruba pa fiha e direccion cu Aruba mester bay pa transiciona energia, y baha e uzo di HFO. “Mi ta hopi orguyoso cu nos a logra yega na un linea nacional, y cu tur stakeholders ta carga, y awor cu e sosten financiero nos por sigui cu ehecucion di e National Energy Policy”, Evelyn Wever-Croes a finalisa bisando.
