E pregunta cardinal relaciona cu e rijkswet ta: DICON mester di un rijkswet, dicon no un ley local (landsverordening). Ningun di e ministernan kier contesta e pregunta aki. Y si nan bisa: pasobra Evelyn a firma, contesta nan: loke Evelyn a firma no ta mara gobierno ni Parlamento.
Betico Croes dfm a lidera un lucha, hunto cu miles di Arubiano balente. Nan a lucha pa nos mes por manda den nos cas, no pa otro manda riba nos.
Un dicho di Betico Croes “Un pueblo sin dignidad, no tin futuro.”, ta aplicabel na e momentonan aki. E rijkswet ta kita nos dignidad, y lo kita nos futuro. Nos ta un pueblo cu a hereda e spirito di lucha, nos no por laga tur e sacrificionan aki bay benta afo, djis pasobra awor nos tin gobernantenan di turno, cu no ta interesa pa e bienestar di Aruba.
Nos di fraccion di MEP ta bisa NO na Hofa, y no ta nos so.
Tin 13 sindicato, apoya pa sindicatonan di Boneiro, cu ta bisa No.
Casi dies mil firma den e peticion contra Hofa ta bisa No.
10 miembro di Parlamento ta bisa NO, y apenas 3 miembro ta bisa si.
“P’esey mi kier puntrabo: Bo ta kere cu ta corecto pa e 3 ministernan aki descarta tur e bosnan CONTRA, descarta e consequencianan negativo pa abo y bo famia, y djis sigui manera nada un pasa?
Y abo votador di AVP: kico ta BO opinion cu e parlamentarionan di AVP te dia di awe, NO tin opinion riba e ley aki? Nan ta cla pa pasa un mocion pa duna gobierno e consensus, pero nan ta pretende di no tin opinion. AVP ta conoci pa un partido grandi, di trayectoria, cu semper tin un opinion y un posicion, berdad nan kier pa bo kere cu awe nan NO tin opinion?”
