Recientemente, Parlamento tabata tin un reunion cu SVB y AZV riba varios puntonan importante. Locual a resalta mas cu tur cos ta e tantisimo promesanan falso cu e gobierno nobo a hasi y ta hasiendo.
Pensioen di biehes
SVB a informa Parlamento di e costonan di e aumento di reparatietoeslag pa 2025 y e proyeccion pa anjanan sigiente:
Proyeccion di gastonan reparatietoeslag:
2025: 94.9 miyon florin
2026: 121.8 miyon florin
2027: 127.7 miyon florin
Basa riba esaki Parlamento a keda preocupa con e caha di pais Aruba lo carga esaki, y si tin espacio pa carga mas aumento manera e minister president Eman a priminti recientemente. Riba esaki SVB tabata categorico: no tin espacio den e fondo di SVB pa aumentonan substancial di e pensioen.
AZV
Entre otro, a toca e tema di remedinan. A chopi fanfaria e gobierno nobo a bai ZV pa anuncia cu TUR remedi cu AZV tabata cubri, pro cu tempo di pandemia ulanda a xigi pastop di cubri, lo wordo cubri bek door di AZV. Pero mesora Parlamento a haña e confirmacion cu actualmente no ta tur remedi cu pensionadonanti meste, ta wordo cubri door di AZV, y cu tin varios remedi ainda cu e pensionadonan mes mester cubri, siendo cu tin un surplus di mas di 100 miyon florin den e fondo di AZV.
Den Parlamento AZV a confirma cu berdad no tur remedi ta wordo cubri pa AZV ainda.
Pa loke ta e prima di AZV, Prome Minister Mike Eman a priminti recientemente di ta bai elimina e prima aki pa e pensionadonan, pa asina yuda pensionadonan haya mas placa den nan man. Sin embargo sr Eman a enganja e pensionadonan, pasobra no ta e pensionado ta paga e prima di AZV. Pues esaki no lo haci ningun efecto riba e pensionadonan pasobra nan no ta esun cu ta paga e prima aki. Ta SVB ta paga e prima a e pensionado.
E lo ta un alivio si pa SVB cu no lo mester pague mas. Basa riba esaki, Parlamentario Wever-Croes a puntra señor Jacobs si e por informa Parlamento ki impacto e eliminacion di e prima aki tin riba e fondo di AZV, y si a tene cuenta cu esaki tambe den e proyeccionnan di e surplusnan den futuro.
“Mi kier a gradici señor Jacobs pa recorda nos e tempo difícil cu Aruba y AZV a pasa aden ora cu Hulanda a pone presion riba Aruba y AZV pa corta 5 miyon florin pa luna (60 miyon pa anja) di e fondo di AZV durante un crisis di salud. Tambe ta di admira cu na momento cu e crisis a pasa, e ekipo di AZV a drenta den un negociacion cu Hulanda splicandonan kico di berdad por y kico no por, y danki na e esfuerso aki di parti di nan, Aruba a logra di sali di e presion aki sin cumpli ni un biaha cu e 5 miyon florin pa luna. Danki na esaki, e ekipo di AZV a haya hopi elogio di Secretario di Estado e tempo ey señora Alexandra van Huffelen, prome cu el’a baha.
Por ultimo mi kier bisa cu lo mas importante ta cu e Gobierno anterior di Gabinete Wever-Croes a laga ambos fondo di AZV y SVB hopi fuerte y bon para pa asina e comunidad di Aruba por haya un poco alivio pa loke ta e tema di salud, y mi ta spera cu Gobierno nobo aki sigui uza e fondonan laga atras pa yuda comunidad bay dilanti” Parlamentario Wever-Croes a expresa.
