Recientemente Parlamentario Evelyn Wever-Croes a atende un seminario na Universidad di Aruba relaciona cu eleccion 2024, e “aftermath” di e eleccion, y pa wak kico ta e miho sistema electoral pa pais Aruba. Parlamentario Wever-Croes a indica cu e ta importante pa Aruba tin un sistema electoral cu ta goza di e confiansa di comunidad paso ta a traves di e sistema aki, e pueblo ta scohe su gobierno y su politiconan. E ta sumamente importante pa tin un bo sistema di “check and balances”, un sistema den cual un ciudadano ta haya e oportunidad pa por expresa su mes y su deseonan sin miedo.
Durante e seminario tambe a discuti diferente topico riba e tema di con pa fortifica e sistema electoral mas, pa asina Aruba por fortifica su democracia. A bin varios ideanan padilanti y Parlamentario Wever-Croes a indica di ta habri pa tur idea contal cu e ideanan aki ta pa yuda e pais yega na un democracia fuerte, y no pa fragmenta demasiado haciendo Aruba un pais na unda no por goberna debidamente.
Tambe tabata presente virtualmente Profesor Wouter Veenendaal di Hulanda cu tambe a bin cu su idea y sugerencianan. Mirando tur e ideanan cu a bin dilanti durante e seminario aki, ekipo di Universidad di Aruba tin un trabou sumamente grandi pa bay haci. “Esaki ta bay ta un estudio cu lo tuma 4 aña largo y mi lo ta bay ta parti di e discussionnan aki , y mi lo duna mi aporte unda cu por mirando cu mi persona tambe ta desea pa Aruba tin un bon sistema electoral, pa asina Aruba completo por sinti mas confiansa den su gobierno y den su politiconan.
