Despues di a pone presion pa varios siman, porfin awor sindicatonan a hala atencion di gobierno. Sindicatonan uni (13) ta posiciona nan mes contra di Rijkswet HOFA y a haci esaki conoci na parlamento a traves di dos carta cu nan a manda. Apesar di esaki, e gobierno AVP/FUTURO a scoge pa no scuchanan y entrega un acuerdo di e concepto di Rijkswet HOFA na Rijksministerraad.
Ta hopi arogante Minister Geoffrey Wever mester ta pa tuma e iniciativa pa bay di acuerdo cu HOFA, sin consulta cu su propio coalicion den parlamento. Y for di diferente fuente ta saliendo na cla cu no tin un mandato tampoco ni acuerdo di ministerraad tampoco. Te cu awe e carta cu parlamento a pidi gobierno fecha dia 14 augustus 2025 cu a duna e orden pa bay acuerdo cu HOFA, no por wordo presenta.
Sindicatonan ta solidario cu e lucha
Minister Wever a kere cu sindicatonan lo tuma esaki sin retalia. Pero al contrario, sindicatonan a uni y a manda no uno sino dos carta pa para e reunion y tur mocion den parlamento y pa scuchanan prome. Y como cherry riba bolo e parlamentario cu mas voto y experiencia den AVP a para contra su gobierno AVP/FUTURO y bay di acuerdo pa scucha e sindicatonan. Ta parce cu lo por tin mas parlamentario tambe den AVP cu ta contra e proceder aki di Geoffrey, pero no ta tribi ainda di duna nan punto di bista pa rasonnan partidario. Tin un base di solidaridad fuerte contra HOFA entre e sindicatonan. Nan ta sinti nan mes wordo neglisha di parti di gobierno. AVP cu antes tawata tene dialogo social awe ta by-pass sinidcatonan pa por mantene un gobierno.
Presidente di parlamento no ta imparcial
Nos fraccion na varios ocasion a presiona presidente di Parlamento pa yama e reunion pa scucha e sindicatonan. Presidente tin bes ta lubida cu e ta presidi reunionan di parlamento y no ta defensor di gobierno, pa keda sin yama reunionnan cu tin reclamo riba su gobierno. Parlamento ta un organo cu tin di funciona independiente di gobierno y e separacion di poder den e trias politica tin di wordo respeta, segun Tevreden.
Libertad no tin prijs
E critica riba Rijkswet HOFA ta keda bira mas grandi. Expertonan huridico, entre otro profesornan Elzinga y Nicolaï, a alerta cu e ley ta enpugna cu e Staatsregeling y e autodeterminacion di Aruba ta wordo afecta gravemente. Pero toch Geoffrey ta keda defende e ley como e unico solucion necesario pa por yega na stabilidad financiero. Nos ta kere cu e splicacion di Geoffrey tin argumentonan cu ta basa riba pronosticonan cu ni ta cla ainda. Dijs pa aumenta e percepcion cu ta pa hopi placa ta tuma e paso aki. “Loke cu gobierno ta haci aki, no ta solamente robes, pero peligroso, pasobra Aruba ta core e risico di bay 40 aña bek den tempo” segun Tevreden. Sin duda nos ta keda para duro pa pueblo, sindicatonan y e instituto parlamento keda wordo respeta. Nos tin di pone un paro den e direccion robes cu gobierno a bira aki. Aruba su libertad financiero y autonomia ta bay prome cu un saco di placa pasobra libertad no tin prijs.
