Ya caba pa algun tempo ta scucha cu algun pensionado ta expresando nan preocupacion relaciona cu loke nan ta haya como suma di pensioen.
Parlamentario di Fraccion di MEP, Ricky Hoek a trece e tema aki padilanti y a bisa cu por a wak cu gobierno a duna un aumento di 30 florin di pensioen y e pensionadonan ta puntra dicon 30 florin y no 300 florin.
El a remarca cu ta importante pa sa c’un aumento di 30 pa 300 florin no ta un aumento mucho responsabel. “Gobierno di Aruba ta trahando incansablemente riba e grupo di pensionadonan pa duna nan e atencion necesario den parti financiero. Tur pensionado na Aruba merece un pensioen digno y di cua sigur sigur gobierno di Aruba tin esaki na mente”.
Hoek a duna algun cifra concreto. Den e ultimo 7 añanan, Gabinete Wever-Croes I y II a yega di aumenta pensioen cu 14.7% sin conta e aumento cu e aña aki Minister Oduber lo bay duna tambe.
A baha e prima di AZV di 10.5% pa 5% pa e prome 30 mil florin di entrada di e pensionadonan. Esaki ta trece cu ne cu e suma liber di impuesto di 30 mil florin a baha e peso fiscal pa e pensionadonan.
E parlamentario a remarca cu tur politico ta consciente cu costo di bida ta hopi caro na Aruba, pero tambe globalmente. Despues di e pandemia tur cos na mundo a bira caro. Aruba cu ta importa 90% di su productonan sigur ta importa e inflacion aki tambe.
“Sinembargo, esaki no ta para nos di sigui traha na mehora e calidad di bida di e pensionadonan”, e parlamentario a expresa.
Banda di esaki a subi e pensioen di behes di soltero di 1107 florin pa 1265 florin pa luna y pa e pareha casa di 1864 florin pa 2130 florin pa luna. Esaki ta un aumento di 158 florin pa e solteronan y di 266 florin pa e parehanan casa.
Esaki ta esfuersonan grandi cu gobierno di Aruba ta haci y cu ta bay pa e pensionadonan
E pensionadonan tambe ta expresa nan mes bisando cu Aruba tin un surplus grandi y dicon e surplus aki no ta wordo duna na e pensionadonan.
Parlamentario Hoek a enfatisa cu parti di e surplus ta bay na e pensionadonan, pero mester corda cu Aruba ta den un situacion financiero un poco precario y ta trahando duro pa drecha esaki.
Ademas di e pensionadonan tin otro prioridadnan y proyectonan cu sigur mester haya atencion financiero manera educacion, vivienda, salud, entre otro. Parti di e surplus tambe ta bay pa paga debe.
No mester lubida cu Aruba a haya un debe hopi grandi for di Gabinete Mike Eman I y II di 180 miyon florin cu a subi te na 445 miyon. Esaki a haci cu e situacion financiero di Aruba a bay hopi atras. Riba dje a bin Covid-19 y esey tabata un guiyotina na e cabes di Aruba, a indica.
Aruba ta recuperando na un manera hopi positivo y door di esey den e ultimo tres añanan Aruba a haya un surplus. Un parti di esaki ta bay pa paga debe y otro parti gobierno tin e como prioridad di tur persona ariba e isla aki.
E pensionadonan mester keda trankil. Gobierno tin nan na curason y na mente. “Mi ta kere tambe cu promesanan falso di redobla pensioen sigur no ta responsabel (…) Unabes cu ta bay haci promesanan cu no ta responsabel e consecuencia financiero ta bay bin pa tur esnan cu ta biba ariba e isla aki. Tanto esnan cu ta disfruta di e pensioen caba y esunnan cu ta na porta di pensioen y cu ta bay hay’e dentro di un par di aña. Pero sigur esnan cu tin bay traha hopi ainda”, Ricky Hoek a expresa.
Gabinete Wever-Croes ta traha na un forma responsabel. Cada grito di auxilio cu tin gobierno tin oido pa nan, Parlamentario Hoek a declara.
