Parlamentario di AVP, ing. Carlos Bermudez a expresa claramente cu e tin hopi respet pa sindicatonan, pero cu respet no ta sinonimo di silencio. Ora tin inconsecuencia of dobel moral, mester menciona esey sin miedo y cu tur transparencia.
Bermudez a tuma nota cu diaranson ultimo sindicatonan a organiza un demostracion cu borchinan cu frase “Wij kunnen zelf”. Riba un momento caminda nos mester mustra unidad dentro di Reino Hulandes. Loke a mustra ta hustamente desunion. E tipo di accion aki no solamente ta iresponsabel, pero tambe ta manda un señal político cla: en bes di uni pueblo, ta dividi; en bes di representa tur trahador, ta sirbi un interes selectivo.
E tema HOFA ta y semper lo ta un asunto estrictamente politico. No ta y nunca lo bira un tema laboral. Pretende contrario ta simplemente confundi pueblo.
Durante pandemia na 2020, ora Hulanda a extende un man di yudansa pa Aruba, no tabata ni un sindicato dilanti oficina di Gobernador of VNO cu borchi cu palabra di reconocemento\gradicimento. Tampoco esey tabata di spera, pasobra e tema tabata politico. Pero e contraste cu situacion actual ta mustra un falta di coherencia.
Na 2024, ora gabinete Wever-Croes II a anuncia cu tin surplus, pero riba 4 di juni 2024 a firma un Bestuurlijk Akkoord cu ta habri caminda pa un Rijkswet, sindicatonan a keda completamente den silencio. Ni un critica, ni un manifestacion, ni un posicion. Nan no a lanta un borchi cu frasenan manera “NEE aan Bestuurlijk Akkoord”. Esaki no ta casualidad, esaki ta selectividad.
Ademas, ora Gabinete Wever-Croes II a gaba publicamente, via IslaOnline y den varios conferencia di prensa, cu e firmamento di e Bestuurlijk Akkoord lo trece 16 miyon adicional den caha di gobierno, sindicatonan tampoco a cuestiona e contradicción di a sigui cu e Rijkswet mientras cu tin surplus. Nan no a defende interes laboral den e momento ey. Nan no a puntra si por a uza e recuerso ey pa crea empleo, pa mehora servicio, ni pa beneficia trahadornan. Esaki si tabata nan rol, pero nan a keda completamente keto.
Ainda mas, ora a expresa cu e Rijkswet tabata negocia pa 90%, a reina un silencio total. Ningun voz, ningun resistencia. Esaki ta confirma cu nan accionnan no ta basa riba principio, sino riba conveniencia.
Loke ta mas preocupante, segun Bermudez, ta e echo cu despues di 28 maart 2025, ora gabinete AVP-FUTURO a asumi responsabilidad, diripiente e sindicatonan “a spierta”. Awor si nan ta protesta, awor si nan ta papia, awor si nan ta mete den politica. Esaki ta un señal evidente cu neutralidad no ta existi y cu tin un color político claramente presente.
Sindicatonan tin tur derecho pa expresa nan opinion—esey no ta discusion—pero credibilidad bo no ta gana cu solamente demostracion, bo ta gane cu consistencia. Y bo ta falta di consistencia y conherencia, confianza automaticamente ta bay perdi.
Fraccion AVP ta mantene su posicion firme: nos lo warda consehonan di Raad van Advies (Aruba) y Raad van State (Hulanda) prome cu trece cualkier conclusion definitivo.
Durante e reciente reunion cu e sindicatonan, nan a sali expresa cu nan NO ta liga na un partido político. Bermudez ta spera cu esaki ta e caso y lo monitoria e punto aki pasobra accion di pasado pa cu proceso di Rijkswet a laga un duda.
Por ultimo, Parlamenario Bermudez a indica cu “si bo ta fanatico di RoodKapje, lo bo mira e wolf semper como e culpabel; aunke e realidad por ta completamente diferente.
