Parlamentario ing. Carlos Bermudez ta pidi claridad y solucion pa Arubus y instalacion di bushaltenan

Parlamentario Carlos Bermudez di Fraccion di AVP ta expresa su preocupacion tocante e situacion di Arubus y ta pidi paso concreto pa atende e problemanan cu ta afecta e compania, su empleadonan y e personanan cu ta depende di transporte publico. Durante e conferencia di prensa semanal di e fraccion di AVP, Bermudez a anuncia cu e lo rappel Minister di Transporte Dowers riba preguntanan cu e a manda caba tocante e asunto.

Ademas di e preguntanan na e minister, Bermudez a acerca Parlamento, cu un peticion pa invita Arubus na un reunion, pa parlamento por haya informacion directo tocante e situacion y e pasonan necesario pa yega na un solucion.

Bermudez a splica cu su peticion pa invita Arubus a wordo presenta prome cu e inauguracion di e aña parlamentario. Pa continua cu e convocacion di e reunion, tabata necesario pa warda riba e decisionnan tocante presidencia di e comisionnan parlamentario.

E parlamentario a indica cu e a duna siguimento caba na su peticion, pasobra e ta considera importante pa e reunion tuma lugar y pa e asunto ricibi e atencion cu e ta merece.

“Mi ta preocupa pa e asunto aki. Mi a haci pregunta caba na Minister Dowers y awor mi lo rappel riba e preguntanan ey. Tambe mi a pidi pa nos invita Arubus na Parlamento, pasobra nos mester haya claridad y traha na un solucion,” Bermudez a expresa.

Segun Bermudez, e situacion di Arubus no ta nobo, sino un asunto cu ta canando algun aña caba. El a señala cu, ora Gabinete AVP–Futuro a asumi e gobernacion di pais, el a wordo confronta cu e situacion existente den e compania. Gobierno anterior a bay laga un debe miyonario habri na Arubus.

Pa e parlamentario, ta necesario pa e discusion conduci na accion concreto, prome cu e problema sigui bira mas grandi. E ta enfatisa cu e impacto no ta limita na empleadonan di Arubus, pero ta toca tambe tur persona cu ta depende di su servicio pa move diariamente.

“Nos por keda papia di debe, pero ta yega un momento cu nos mester soluciona e problema aki prome cu e sigui bira mas grandi. Esaki ta importante tanto pa empleadonan di Arubus como pa tur hende cu ta depende di su servicio,” Bermudez a declara.

Durante e conferencia di prensa, Bermudez a trece tambe e tema di bushaltenan. E a indica cu esaki ta forma parti di e preguntanan cu el a dirigi na Minister Dowers. Segun informacion cu el a ricibi, e bushaltenan a yega Aruba caba. P’esey e kier haya claridad tocante kico ta pasando y pakico ainda nan no a wordo instala.

Bermudez a expresa su preocupacion pa e condicionnan den cual algun usuario di transporte publico ta warda bus, sin proteccion suficiente contra solo.

“Mi ta sinti un duele ora mi ta mira nos hendenan sinta riba un piedra, den e calor di solo, ta warda bus, mientras cu nos ta compronde cu e bushaltenan a yega Aruba caba. Nos mester haci un esfuerzo pa yega na un solucion y instala e bushaltenan lo mas pronto posibel,” e a enfatisa.

Bermudez a sigura cu e lo sigui pendiente tanto di e situacion di Arubus como di instalacion di e bushaltenan. Pa e parlamentario, e meta ta pa e preguntanan y reunionnan conduci na paso concreto cu por mehora e situacion pa empleadonan y usuarionan di transporte publico.

“Mi lo sigui duna siguimento, pasobra ta solucion mi kier mira. Nos mester cuminsa tuma e pasonan necesario. Kizas nos no por resolve tur cos di un dia pa otro, pero si nos mester traha pa yega na un solucion,” Bermudez a conclui.