Parlamentario Ing. Carlos Bermudez ta sigui cu su compromiso pa acceso liber na beach, sostenibilidad, economia y bienestar di pueblo

Parti 2

Como continuacion di su evaluacion na apertura di e aña parlamentario nobo, Parlamentario di AVP, Ing. Carlos Bermudez, ta destaca otro temanan importante cu a forma parti di su trabou durante e periodo anterior y cu lo sigui haya atencion den e lunanan cu ta bin.

Den e prome parti, Bermudez a enfoca riba transporte, derecho laboral y infrastructura. 

Den e segundo parti aki, e parlamentario ta amplia riba proteccion di acceso liber na beach y palapanan, naturaleza, sector primario, diversificacion economico, salud, empleado publico y otro reto strategico pa futuro di Aruba.

Proteccion di acceso liber na beachnan y un maneho husto di palapanan a forma un parti importante di su agenda. Bermudez a entrega un mocion pa solicita un beach policy cla, transparente y aplicabel, cu ta salvaguardia e derecho di localnan y bishitantenan pa disfruta libremente di nos beachnan.

E parlamentario ta satisfecho cu gobierno a duna oido na e preocupacion aki y a anuncia ahuste di e politica existente. Sinembargo, e lo sigui monitor implementacion, pa evita confusion, apropiacion indebido di espacio publico of un situacion caminda hende mester paga of mendiga pa haya acceso na un beach of palapa publico.

“Nos beachnan ta patrimonio natural y cultural di Aruba. Desaroyo turistico ta importante, pero acceso liber di pueblo mester keda proteha,” Bermudez a declara.

Den e mesun espirito di balans, Bermudez a participa den dialogo cu operadornan di UTV/ATV tocante proteccion di naturaleza, siguridad y continuidad di trabou local. Su posicion ta cu naturaleza mester wordo proteha seriamente, pero cualkier medida mester ta cla, proporcional y prepara den dialogo cu e sector.

Pa Bermudez, e solucion no ta scoge entre naturaleza of economia. Aruba mester busca un modelo cu ta proteha areanan vulnerabel, garantisa siguridad y comportacion responsabel, mientras e ta ofrece empresarionan y trahadornan local un marco cla pa funciona.

Den sector primario, e parlamentario a sostene inversion den piscamento, incluyendo instalacion di boeinan artificial na punto strategico pa atrae mas pisca. Bermudez, kende personalmente conoce e realidad di piscamento via experiencia cu su difunto tata, Dominico “Do” Bermudez, ta considera cu fortalece piscamento ta inverti den produccion local y siguridad alimentario.

El a destaca cu piscadonan ta enfrenta costo di combustibel, mantencion di boto, riesgo y incertidumbre cada biaha cu nan subi lama.  P’esey, politica y publico mester reconoce nan contribucion y promove dialogo entre piscadonan, gobierno y defensornan di medio ambiente y bida marino.

Riba tereno economico, Bermudez a destaca incentivonan fiscal pa starters, profesionalnan cu kier bolbe Aruba, revitalisacion di San Nicolas y Oranjestad, Freezone y oportunidadnan den FinTech.

E incentivonan aki por yuda crea negoshi nobo, atrae inversion y ofrece hobennan profesional un motibo pa regresa Aruba. Segun Bermudez, diversificacion economico ta esencial pa Aruba no keda depende exclusivamente di turismo.

Tambe el a sostene un vision nobo pa e ex-tereno di refineria, combina cu desmantelamento, saneamento, transicion energetico, innovacion y actividad economico nobo. E posibilidadnan menciona a inclui sector comercial, cultural, industrial y tecnologico, incluyendo FinTech y bitcoin mining, semper bou di condicionnan responsabel y sostenibel.

“Si nos kier retene nos hobennan, nos no por sigui pensa solamente den modelonan di ayera. Nos mester crea espacio pa innovacion, creatividad y oportunidad nobo,” Bermudez a enfatisa.

Su trabou a inclui tambe preparacion pa embehecemento di poblacion. E tendencia aki tin implicacion serio pa salud, infrastructura, pensioen y mercado laboral. Bermudez ta sostene mas flexibilidad pa grandinan cu kier sigui activo despues di pensioen y condicionnan cu reconoce nan experiencia y contribucion.

Na mes momento, e ta considera esencial crea un programa structural pa profesionalnan Arubiano cu a studia den exterior por bolbe cas. Salario, costo di bida, oportunidad laboral y perspectiva di futuro ta factornan cu mester wordo atende si Aruba kier recupera su talento.

Otro tema ta trato husto pa empleadonan publico y funcionamento di Departamento di Recurso Humano. Bermudez a pidi mas transparencia, revision di casonan pendiente y solucion pa procesonan of promocionnan cu a keda tranca durante aña.

“Respet pa empleado publico no ta un luho. Ora profesionalnan ta sinti nan mes balora y trata hustamente, e aparato gubernamental henter ta funciona miho,” el a expresa.

Den area di salud, su bishita na Hospital Internacional de Colombia na Bucaramanga a permitie conoce mas di cerca e tratamento, tecnologia y servicio specialisa disponibel pa pashentnan Arubiano. E experiencia a confirma e importancia pa Aruba mantene contacto y cooperacion cu institucionnan cu ta atende nos ciudadanonan den exterior.

Riba tereno internacional, Bermudez a solicita claridad tocante un eventual reapertura di frontera cu Venezuela. E parlamentario ta sostene cu cualkier decision mester wordo prepara responsabelmente y tene cuenta cu siguridad, economia, trafico maritimo y aereo, y e realidad geopolitico den region y Reino Hulandes.

Durante e aña parlamentario nobo, Bermudez lo sigui acerca e ministernan concerni y monitor si mocionnan, preguntanan y compromiso ta conduci na resultado concreto.

“Mi compromiso ta pa sigui scucha, sigui puntra, sigui controla y, mas importante, sigui busca solucion. Pueblo no ta spera solamente palabra; pueblo ta spera resultado. Cu dialogo, determinacion y trabou serio, nos por sigui construi un Aruba mas husto, sigur, ordena y sostenibel pa nos tur,” asina Parlamentario Carlos Bermudez a conclui.