No tur trabou parlamentario por wordo midi den cantidad di reunion. Tin biaha cu un pregunta den Parlamento por pone un tema importante riba agenda. Otro biaha, un combersacion cu un trahado di hotel of un empresario local por duna un bista cu ningun rapport por transmiti completamente.
Pa Parlamentario Jennifer Arends-Reyes, Presidente di Comision di Turismo di Parlamento di Aruba, esey tabata e hilo central durante aña parlamentario 2025–2026: sali, tende, observa, cuestiona y sigui e trabou.
“Turismo ta e motor principal di nos economia, pero tras di cada cifra tin hende. Tin e trahado di hotel, e taxista, e artista local, e guia turistico y e famia cu ta depende directo of indirectamente di turismo. P’esey, ora nos papia di futuro di turismo, nos mester papia tambe di futuro di nos pueblo,” Arends-Reyes ta expresa.
Un momento cu a keda cu ne tabata e bishita na Radisson Blu Aruba. E transformacion di e propiedad tabata impresionante, pero loke mas a hala su atencion tabata e team gerencial completamente local.
“Mi a mira profesionalnan Arubiano liderando cu orguyo, capacidad y vision. Pa mi, esey ta e tipo di progreso cu turismo mester trece: no solamente mas camber of mas bishitante, sino mas oportunidad pa nos propio hende crece.”
Den su trabou formal, Comision di Turismo a ricibi Aruba Tourism Authority, ATA, pa presentacion di su Corporate Plan & Budget 2026. E plan a pone enfasis riba “high-value, low-impact tourism”: un turismo cu no ta mira solamente cantidad di bishitante, sino tambe impacto economico, social y ambiental.
Durante e presentacion, miembronan di Parlamento a pidi claridad riba distribuimento di presupuesto, resultado cu mester logra y manera cu ATA lo midi e beneficio concreto pa comunidad.
“Nos responsabilidad no ta solamente tende un presentacion. Parlamento a tuma su tempo pa cuestiona, controla y percura pa e inversionnan realmente beneficia pueblo di Aruba.”
Aña parlamentario tambe a conoce momentonan doloroso. Despues di varios incidente tragico na beach, Arends-Reyes a presenta preguntanan oficial y un mocion tocante introduccion di personal salbabida. E preguntanan a trata responsabilidad institucional, entrenamento, certificacion, borchinan di advertencia y reaccion durante emergencia.
“Un destinacion di calidad mester ofrece no solamente un bunita experiencia, sino tambe proteccion y preparacion. Siguridad di nos beachnan mester forma parti structural di nos politica turistico.”
Otro tema importante tabata e crecemento di short-term vacation rentals, manera Airbnb. Arends-Reyes a sigui pidi atencion pa competencia husto, pago corecto di impuesto, normanan di siguridad y impacto riba vivienda.
“E sector por crea entrada pa hopi famia, pero libertad economico mester bay hunto cu responsabilidad. Crecemento turistico no mester pone presion desproporciona riba nos barionan of haci vivienda menos accesibel pa nos propio hende.”
Durante tratamento parlamentario di e contract di ATA pa maneho di desperdicio, Arends-Reyes tambe a enfatisa cu un Aruba limpi ta parti esencial di un bon producto turistico, pero principalmente di calidad di bida di su habitantenan.
Como Presidente di Comision, el a mantene contacto directo cu sector door di bishita Gateway 2030 na aeropuerto, Radisson Blu Aruba y RIU Palace Aruba, cu recientemente a completa un renobacion di aproximadamente US$106 miyon. E bishitanan a crea espacio pa dialoga tocante inversion, experiencia di pasahero, talento local, sostenibilidad y competitividad.
Na Alto Vista Winery, participacion den e Compost Alliance a mustra con hotelnan por transforma resto di cuminda y desperdicio organico den compost.
“Sostenibilidad no mester keda solamente un palabra. Aki nos a mira con cooperacion por transforma desperdicio den un recurso nobo y contribui na produccion local.”
Pa Arends-Reyes, e trabou no ta caba cu e cierre di aña parlamentario. Hopi tema ainda ta exigi seguimiento y resultado concreto.
“Mi no kier solamente papia tocante turismo ora tin un inauguracion of un cifra positivo. Mi kier sigui presente tambe ora tin pregunta dificil of preocupacion den comunidad. Liderato, pa mi, ta presenta, tende y sigui e trabou te cu tin resultado.”
Su vision ta keda cla: Aruba ta den demanda y por scoge pa nos tin cada biaha un miho turismo. Un turismo cu ta proteha nos naturaleza y cultura, inverti den siguridad, crea oportunidad pa talento local y pone bienestar di pueblo di Aruba den centro di cada decision.
