Parlamentario Jennifer Arends-Reyes ta mira e bishita oficial reciente di Minister di Desaroyo Economico di Corsou, Roderick Middelhof, na Aruba como un paso importante den fortalecemento di e relacion historico, social y economico entre e dos paisnan.
Durante e bishita, Minister Middelhof y Minister di Turismo, Transporte y Labor di Aruba, Wendrick Cicilia, a firma un Memorandum of Understanding (MOU) cu tin como obhetivo intensifica cooperacion entre Aruba y Corsou den diferente area strategico.
E acuerdo, cu inicialmente ta valido pa un periodo di tres aña, ta enfoca riba desaroyo turistico, conectividad aereo y maritimo, siguridad turistico, sostenibilidad, investigacion y capacitacion profesional den sector turistico.
Segun Arends-Reyes, e firma di e acuerdo ta refleha e reconocemento cu Aruba y Corsou ta comparti no solamente un historia comun, pero tambe hopi oportunidad y desafio similar.
“Aruba y Corsou no ta solamente paisnan den e mesun Reino. Nos ta comparti historia, cultura, amistad y inclusive lazonan familiar. P’esey ta importante cu nos cooperacion no keda limita na bon intencion, pero cu e ta produci resultado concreto pa nos ciudadanonan, emprendedornan y sector priva,” Arends-Reyes a declara.
Un di e aspectonan cu e parlamentario ta considera particularmente prometedor ta e intencion pa explora un concepto di multi-destinacion entre Aruba y Corsou. E iniciativa por crea oportunidad nobo pa atrae mas bishitante na region y ofrece experiencianan turistico mas amplio y atractivo.
“Turismo moderno ta cada bes mas basa riba experiencia. Ora Aruba y Corsou colabora pa presenta nan mes como destinacion complementario, nos por aumenta atracion di nos region y crea beneficio economico pa ambos paisnan,” Arends-Reyes a expresa.
E acuerdo ta contempla tambe un cooperacion estrecho entre Aruba Tourism Authority, Curaçao Tourist Board, aeropuerto, aerolineanan, companianan di crucero y otro partnernan relevante den industria. Intercambio di informacion, promocion conhunto, capacitacion y desaroyo di producto turistico ta entre e accionnan identifica pa fortalece e posicion competitivo di e region.
Arends-Reyes a enfatisa cu conectividad ta un elemento esencial pa e exito di cualkier iniciativa di integracion economico y turistico.
“Conectividad accesibel, eficiente y confiabel ta fundamental pa desaroyo economico. Ademas di mas opcionnan aereo, ta hopi positivo cu ambos pais ta investigando e viabilidad di un servicio di ferry pa transporta tanto pasahero como carga entre Aruba y Corsou,” el a indica.
Segun e acuerdo, e proyecto di ferry lo inclui un estudio di factibilidad y preparacion di un proceso publico pa identifica y selecciona un operador cu por garantisa sostenibilidad y calidad di servicio.
Arends-Reyes a subraya cu, manera cu pasa cu tur acuerdo importante, implementacion lo determina e berdadero exito di e iniciativa. “E firma di e MOU ta un bon comienzo, pero awor ta momento pa converti e compromiso den accion. Lo mester sigui monitor e progreso, identifica oportunidadnan concreto y percura cu e cooperacion ta traduci den beneficio real pa nos pueblo y nos economia,” el a declara.
E parlamentario a conclui indicando cu fortalecemento di cooperacion entre Aruba y Corsou no solamente ta beneficia e dos paisnan individualmente, pero por contribui tambe na un posicion mas fuerte pa henter Caribe Hulandes.
“Ora Aruba y Corsou uni nan experiencia, conocemento y capacidad, nos por crea mas oportunidad, mas crecemento y un futuro economico mas sostenibel pa nos region. Esaki ta e direccion cu nos mester sigui construi hunto,” Arends-Reyes a conclui.
