Lider di fraccion AVP den Parlamento y president di Comision di Turismo, Jennifer Arends-Reyes, a expresa su firme apoyo pa e proyecto Gateway 2030, cual segun e, ta representa un paso strategico y necesario pa fortalece economia di Aruba y garantisa crecemento duradero pa nos pais.
Arends-Reyes a enfatisa cu cada fase cu ta completa den e proyecto Gateway 2030 ta un señal cla di progreso y modernisacion pa Aruba. Segun e lider di fraccion, e inversionnan den infrastructura di aeropuerto no solamente ta mehora e experiencia di bishitante, sino tambe ta crea oportunidadnan nobo pa empleo, negoshi y innovacion den diferente sector di economia.
“Gateway 2030 ta esencial pa progreso y economia di Aruba,” Arends-Reyes a declara, señalando cu un aeropuerto moderno y eficiente ta un pilar fundamental pa mantene Aruba competitivo den region Caribe y den mercado turistico internacional.
Parlamentario Arends-Reyes tambe a felicita tur trahado, ingeniero y profesional cu diariamente ta contribui na realizacion di e proyecto, reconociendo nan compromiso cu desaroyo di Aruba. Ela a recalca cu inversion den infrastructura no ta un gasto, sino un inversion directo den futuro di nos economia y bienestar di nos comunidad.
Segun Arends-Reyes, turismo ta un di e motor principal di economia di Aruba, y modernisacion continuo di Aeropuerto Internacional Reina Beatrix ta vital pa sostene crecemento economico, atrae mas bishitante y fortifica posicion di Aruba como destino di calidad mundial.
Fraccion AVP ta sigui monitor progreso di e proyecto Gateway 2030 y lo continua traha constructivamente pa garantisa cu e desaroyo aki ta beneficia tur ciudadano di Aruba, awor y den futuro.
