Parlamentario Jennifer Arends-Reyes, den su calidad como president di e comision di turismo di Parlamento di Aruba, tabatin e honor di asisti y hiba palabra na e di tres edicion di e Aruba Impact Awards, presenta pa e Aruba Hotel and Tourism Association (AHATA).
E acto, cu a tuma luga den presencia di lidernan di industria, partnernan strategico y representantenan di sector turistico, a rindi homenahe na e empresanan cu ta pone compromiso social, bienestar di empleado, herencia cultural y sostenibilidad ambiental den central den nan operacion.
“Ta un gran honor pa mi pa ta aki awe entre boso pa celebra esunnan cu ta move nos industria di turismo dilanti—pero cu pasion, direccion y un profundo respet pa futuro di Aruba,” asina Arends-Reyes a habri su discurso.
E Impact Awards ta personifica e rumbo nobo cu Aruba kier tuma bou di e plan di gobernacion AVP-Futuro: un Aruba cu ta economicamente fuerte, socialmente inclusivo y ambientalmente resistente. “Nos no por keda sigui cu un turismo cu solamente pensa riba crecemento. Nos tin cu pensa riba calidad di bida di nos pueblo, nos identidad cultural y nos medio ambiente natural,” Arends-Reyes a enfatisa.
E cuatro categoria di premiacion—Inversion Social, Bienestar di Empleadonan, Preservacion di Cultura y Conservacion Ambiental—ta pilar importante den e transicion na un modelo di High-Value, Low-Impact Tourism, un modelo cu ta pone calidad prome cu cantidad, y cu ta busca prosperidad a la largo plaso na luga di ganashi inmediato.
“Cada empresa cu ta mustra compromiso den un of mas di e categoria aki, ta pone un ehempel pa tur otro. Boso ta lider cu ta traha cu proposito, y ta yuda forma un Aruba cu generacion futuro por ta orguyoso di dje,” el a expresa cu emocion.
Arends-Reyes a pidi un fuerte aplauso pa tur e nominado y ganadornan: “E esfuersonan cu boso ta haci no solamente ta impacta e industria, pero e comunidad, e medio ambiente, y e imagen di Aruba riba nivel internacional.”
E parlamentario tambe a enfatisa cu e mensahe principal tras di e evento—“Si bo stima Aruba, Aruba ta stima bo bek”—no ta simplemente un slogan publicitario, sino un mentalidad cu mester ta presente den tur decision, desde maneho di hotel te na politicanan di gobernacion.
“E mensahe ta cla: turismo cu responsabilidad ta e unico caminda pa loke nos kier logra. Un Aruba prospero, husto y duradero,” e a conclui.
