Segun Jennifer Arends-Reyes, lider di fraccion di AVP, pueblo mester mira e mensahe reciente di Fondo Monetario Internacional (IMF) durante su bishita den cuadro di Articulo IV Mission 2025 cu positivismo. E evaluacion faborabel di IMF ta refleha un Aruba bayendo den bon rumbo, basa riba compromiso firme pa logra un futuro di prosperidad comparti, desaroyo sostenibel y bienestar real pa tur ciudadano.
Modelo di turismo cu balor comparti y diversificacion sostenibel
IMF a duna su respaldo na e modelo di turismo di High-Value, Low-Impact cu Aruba a adopta. E modelo aki ta stimula un turismo cu menos impacto negativo riba e medio ambiente y infrastructura, mientras cu e beneficio ta yega mas directo na e comunidad Arubano.
Ademas, IMF a reconoce e esfuerzo di Aruba pa diversifica su economia den sectornan prometedor manera agricultura, economia circular, energia renobabel y economia creativo. Segun Arends-Reyes, “E apoyo di IMF ta un señal cla cu Aruba ta move den un direccion di inovacion, resiliencia y oportunidad pa nos pueblo.”
Inversion social y bienestar pa pueblo
Un otro punto di aprecio di IMF ta e enfasis riba gasto social di gobierno. A destaca medidanan manera aumento di pensioen, distribucion di remedi y sosten pa grupo vulnerabel.
Segun Arends-Reyes, “IMF ta reconoce cu Aruba ta implementando un sistema di ‘policy-based budgeting’, un metodo basa riba e prioridadnan real: mehora bienestar social, aumenta poder di compra y promove prosperidad pa tur hende.”
Fondo di Inversion y proyecto publico
IMF tambe a pone atencion riba e bon practica di Fondo di Desaroyo Aruba (FDA), cu a demostra transparencia y eficacia den maneho di recurso. E sugerencia pa implementa modelonan semehante pa un Fondo di Inversion Publico ta habri porta pa mas impacto y resultado concreto, semper cu cooperacion entre entidadnan publico y control responsabel di gasto.
“Nos mester inverti sabi, prioritisa proyecto esencial y evita ineficiencia. Asina por crea un base fuerte pa nos futuro,” asina Parlamentario Arends-Reyes a enfatisa.
Validacion internacional
E sosten di IMF ta sirbi como un validacion internacional di e pasonan cu Aruba ta tuma pa logra un modelo economico mas husto, sostenibel y inclusivo.
Pa AVP, e rumbo ta cla: un Aruba fuerte, diversifica, cu un pueblo cu por sinti e beneficio den su bida real.
