Den cuadro di e ultimo fin di siman di celebracionnan di Carnaval, Parlamentario y lider di fraccion di AVP Sra Jennifer Arends-Reyes ta haci un yamada firme pa pone siguridad na prome lugar durante tur actividadnan Carnavalesco. Segun e parlamentario, alegria y tradicion mester bay man den man cu responsabilidad y proteccion di nos comunidad.
“Carnaval ta un parti esencial di nos identidad cultural. Ta un temporada di union, creatividad y orguyo nacional. Sinembargo, siguridad mester ta semper nos prioridad,” Arends-Reyes a declara.
E parlamentario ta enfatisa importancia di cooperacion estrecho entre autoridadnan, organizadornan, boluntarionan y ciudadano pa preveni incidente y garantisa un ambiente sano, controla y sigur pa tur hende.
Entre e puntonan principal cu Arends-Reyes ta subraya tin:
• Presencia visibel y coordinacion efectivo di polis y servicionan di emergencia.
• Control riba consumo excesivo di alcohol y prevencion di uzo di droga.
• Siguridad vial, cu suficiente control di trafico y opcionnan di transporte despues di eventonan.
• Proteccion di mucha y hobennan durante actividadnan Carnavalesco.
• Proteccion di oido pa grandi y chikito durante eventonan cu nivel halto di zonido.
• Informacion cla y comunicacion rapido den caso di emergencia.
“Ta den nos mesun man pa un momento di celebracion no bira un momento di lamento. Prevencion ta clave. Cada persona tin un rol: como mayor, como organisado y como participante,” Arends-Reyes a añadi.
E parlamentario tambe ta haci un yamada special na hobennan pa celebra cu responsabilidad, evita pelea, abstene di maneha bou di influencia y laga tras conducta imprudente cu por pone bida na peliger.
Finalmente, Arends-Reyes ta expresa su profundo reconocemento y gratitud na polis, boluntarionan, personal medico y tur esunnan cu ta traha incansablemente durante Carnaval pa mantene orden y siguridad den nos comunidad.
“Un Carnaval berdaderamente exitoso no ta solamente esun cu tin hopi briyo y musica, sino esun caminda tur hende por disfruta, y despues por bay cas sigur.”
