Parlamentario di AVP, John Hart, ta haci un yamada firme pa reflexion y accion responsabel den Parlamento di Aruba despues di a haci un analisis profundo di e cuenta anual 2020 di Algemene Rekenkamer di Aruba (ARA), cu ta mustra varios iregularidad significativo, decision ilegal y deficiencia structural den e maneho financiero durante e periodo di Gabinete Wever-Croes.
Segun Sr. Hart, e rol di Algemene Rekenkamer como organo independiente ta fundamental pa garantisa cu fondonan publico ta aneha conforme ley, cu transparencia y cu responsabilidad. E rapport di ARA, segun e parlamentario, no solamente ta documenta iregularidadnan, sino tambe ta lanta preguntanan serio tocante gobernacion, control financiero y respet pa normanan legal den e maneho di fondonan di pueblo.
“E rapport di Algemene Rekenkamer ta mustra claramente cu durante aña 2020, casi 43 miyon florin di yudansa den marco di FASE a wordo paga sin un base legal. Esaki ta representa un violacion grave di regulacionnan financiero y ta obliga nos como parlamento pa analisa e echo aki cu seriedad y responsabilidad,” Sr. Hart a declara.
Riba pagina 80 di e rapport, ARA ta describi varios iregularidad durante e proceso di aplicacion, evaluacion y pago di e programa FASE. Entre otro, e rapport ta indica cu e responsabilidad pa ehecuta e pagonan inicialmente tabata bou di Departamento di Asuntonan Social (DAS), pero despues e maneho a wordo transferi pa Departamento di Finansas (DF) pa ehecuta pagonan via e sistema di payroll. Sinembargo, segun e hayazgonan di ARA, e cambionan den procedimiento no a wordo registra formalmente, creando un situacion unda controlnan interno no tabata suficiente pa preveni pagonan dobel of errornan administrativo.
Ademas, e rapport ta señala cu Departamento di Asuntonan Social no tabatin un procedura skirbi pa pagonan cash na beneficiario cu no tabatin un cuenta bancario, un deficiencia cu por pone en riesgo transparencia y verificacion di fondonan publico.
“Den un estado di derecho serio, respet pa ley y pa regulacionnan financiero no ta opcion, sino obligacion. Cuando tin indicacion di iregularidadnan asina, e responsabilidad di Parlamento ta pa investiga, discuti y saca conclusionnan riba base di echo y evidencia,” Sr. Hart a enfatisa.
E parlamentario a indica cu e rapport di ARA tambe ta menciona iregularidad den actividadnan ilegal relaciona cu prestamonan cu Aruba a cera, incluyendo prestamonan internacional y emision di obligatieleningen, tema cu merece igualmente un evaluacion institucional serio.
Sr. Hart ta enfatisa cu e yamada aki no ta un cuestion di politica partidista, sino di responsabilidad publico y respet pa principio di buen gobernacion. “Transparencia, responsabilidad y respet pa ley ta fundamento di confianza publico. Pueblo di Aruba tin derecho di sa con nan fondonan a wordo maneha y si proceduranan legal a wordo sigui,” e parlamentario a declara.
Den cuadro di fortalecemento di control democratico y disciplina financiero, Sr. Hart ta solicita formalmente na Presidente di Parlamento pa convoca un reunion riba e tema aki, pa asina Parlamento di Aruba por evalua e hayazgonan di Algemene Rekenkamer y duna direccion claro riba e siguiente pasonan necesario.
“Parlamento ta e foro constitucional unda e tipo di asunto aki mester wordo trata. No pa crea division, sino pa garantiza responsabilidad, transparencia y confianza den nos institucionnan,” asina e parlamentario ta conclui.
