Na ocasion di Dia Internacional di Archivo, Parlamentario Xiomara Maduro ta felicita Archivo Nacional Aruba, Biblioteca Nacional Aruba, y tur archivista cu ta traha dia tras dia pa warda e historia y patrimonio di Aruba. “Archivo ta e columna vertebral di nos memoria nacional. Nan ta warda nos pasado y conserva esaki pa generacionnan futuro. Mi ta expresa mi gran apreciacion pa e trabou y dedicacion di tur nos archivista,” Maduro a bisa.
Dia Internacional di Archivo, celebra tur aña dia 9 di juni, ta un iniciativa di International Council on Archives (ICA) y e dia aki ta pone enfasis mundial riba e papel fundamental cu archivo tin den transparencia, educacion y conservacion cultural. Den 2025, e dia aki ta forma parti di e Siman Internacional di Archivo, cu ta inclui presentacionnan Lightning Talks di ICA, caminda profesionalnan ta comparti proyectonan innovador. Prome cu e aña finalisa, tambe lo tin un congreso mundial di archivo na Barcelona (27–30 di oktober) bou di tema “Knowing Pasts. Creating Futures.”
Colaboracion den Coleccion Aruba
Parlamentario Maduro ta pone enfasis especial riba e colaboracion ehemplar den Coleccion Aruba, un plataforma digital cu ta resulta di un esfuerso conhunto di Biblioteca Nacional Aruba, Archivo Nacional Aruba, y dies (10) otro institucionan di patrimonio. E plataforma aki ta unifica y pone na disposicion publico coleccionnan historico di museo, archivo y biblioteca den un solo luga digital. Coleccion Aruba ta uza tecnologia digital pa amplia acceso na historia di Aruba y ta sirbi como modelo di cooperacion, intercambio di conosemento y preservacion sostenibel di patrimonio. “Coleccion Aruba ta un ehempel cla di kico nos por logra ora cu nos traha hunto. E colaboracion aki ta pone nos patrimonio cultural na bista di pueblo, investigadornan y studiante – tanto na nivel local como internacional,” Maduro a agrega.
Yamada pa sosten continuo
Parlamentario Maduro ta haci un yamada na gobernantenan, institucionnan di enseñanza y comunidad, pa sigui inverti den archivo y coleccionnan cultural di Aruba: “Un Aruba cu ta prepara pa futuro ta cuminsa cu respet pa su pasado. Nos archivo y coleccionnan di patrimonio mester haña sosten continuo – como fuente di conocemento, identidad y orguyo.”
