Durante di e reunion publico di 25 y 27 di Juni 2024, Parlamento a trata e Ley di e prome presupuesto Supletorio di aña 2024. Durante di e reunion publico aki, parlamentario Mike Eman a presenta dos mocion: (1) pa subi e indexering, mas di loke Gobierno a duna na ambtenaarnan, esta e 11.7% cu a conta cu aprobacion unanime di tur sindicato, y (2) mocion cu ta urgi pa gobierno duna un suma substancial pa reparatie toeslag na sector priva.
Gobierno dunando bek responsablemente
Ta bon pa pueblo sa cu despues di Pandemia di Covid-19, aña 2023 tabata e prome aña den cual pais Aruba a recupera su economia bek compara cu 2019. Adicionalmente, e tabata e prome aña cu Aruba tabata tin un surplus riba su presupuesto. Esaki a facilita cu Gobierno di Aruba por a paga 153 miyon florin riba e debe nacional y 129 miyon florin pa 2024. E ta pasobra gobierno a hiba un maneho responsabel y disciplina cu na 2024 por a cuminsa duna bek na pueblo di un forma responsabel. Gobierno a investiga y studia con y kico lo por duna sin cu esaki por afecta nos finanzas publico y sin crea mas debe pa nos pais.
Minister Ursell Arends den Parlamento: “Mocion di AVP ta irrealistico!”
Durante e ronda di contestacion di Gobierno, minister Ursell Arends a elabora riba e dos mocionan di Mike Eman. Minister Arends y gobierno a yama e mocionan irrealistico y cu AVP no a midi ni investiga e consecuencianan financiero pa nos pais cual porcierto ta masha comun den AVP. Minister Arends a splica cu despues di a consulta cu profesionalnan y SVB, gobierno a bin n’e conclusion cu si aproba AVP su mocionnan esaki lo significa e bancarota di e fondonan di SVB. Naturalmente p’e motibo aki gobierno a duna un conseho negativo riba e mocionan di AVP.
Mocionnan a wordo rechasa pa henter Parlamento.
Ora e yega e momento pe votacion riba e dos mocionan di AVP, parlamentario Gerlien Croes, Aquanette Gunn, Marisol y Mansur a sali di sala pa demostra cu nan no ta sostene AVP su mocionnan. Esaki tabata un momento dramatico den cual e fraccionan aki a manda un mensahe cla y raspa pa AVP: “Stop cu boso locura irrealistico cu ta cabando cu nos pais!” Naturalmente Coalicion den Parlamento a vota contra e mocionan irrealistico hunto cu parlamentario independiente Ryçond Santos Do Nascimento.
Expectativanan pa presupuesto 2025
E bon noticianan cu gobierno a cuminsa comparti pa pueblo, pasobra di e forma responsabel cu Gabinete Wever-Croes a bin ta goberna sigur ta bon noticia tin pa comparti. E bon maneho aki ta produciendo expectativanan nobo riba kico presupuesto 2025 lo por trece cune pa progreso di nos pais, y kico gobierno lo por haci pa sigui yuda pueblo recupera su poder di compra perdi. Mientras tanto esaki ta loke gobierno a establece den su presupuesto supletorio 2024:
- Pensioen di Aruba a subi 4 biaha y a yega na un aumento di 14.7%.
- Trahador di stichting ta haya 2.8 miyon florin.
- Uitkering pa hende descapacita lo bay subi. E suma exacto lo wordo anuncia pronto.
- Salario Minimo a subi pa 1.986 florin.
- Prima di AZV pa pensionado a baha cu 1.5%.
