Dialuna 8 di juli 2024 lo keda graba den historia di nos pais, ya cu riba e fecha aki Parlamento 11 di Aruba a vota pa confirma y legalisa e prome Ombudsman di Aruba. Aruba tabata e ultimo pais den Reino Hulandes cu no tabata tin su propio Ombudsman, pero aworaki finalmente esaki a bira un realidad. Tabata tin hopi persona cu tabata cuestiona si enberdad e Ombudsman lo concretisa, sinembargo un biaha mas coalicion den Parlamento a sa di pone su prioridadnan y pone Aruba y pueblo su interesnan prome.
Jurima Bryson: Aruba su prome Ombudsman
E comision, cu ta consisti di presidente di Organo Consultativo (Raad van Advies), presidente di Contraloria General (Algemene Rekenkamer) y presidente di Corte Comun (Gemeenschappelijk Hof van Justitie) a entrega tres nomber di candidato bon studia y cualifica na Parlamento pa un di nan wordo nombra como e prome Ombudsman di Aruba. Sinembargo despues cu sr. Croes, a retira como candidato di Ombudsman, solamente dos candidato a keda. Di e forma aki dialuna 8 di juli a yama e reunion publico den Parlamento pa asina vota pa e prome Ombudsman di Aruba. E resultadonan a drenta lihe: 12 voto pa sra. Bryson y 8 voto na fabor di sra. Paskel. Di e forma aki sra. Jurima Bryson a keda eligi oficialmente pa Parlamento y a bira e prome Ombudsman di Aruba.
Pabien na sr. mr. Edgard Vrolijk pa finalisa e proceso di e ley di Ombudsman
A cuminsa traha riba e ley di Ombudsman na 2005, pero Gabinete Oduber no a logra finalis’e. Siguiente gobierno a laga e ley drumi den lachi y na 2014-2015 AVP a sigui cu e proceso, pero tampoco no a finalisa esaki pa asina e ley por a finalmente keda trata den Parlamento. Remarkabel ta cu durante 2014-2015 AVP tabata tin 13 asiento den Parlamento pero a dicidi e tempo ey pa pone e ley un biaha mas den lachi y nunca a concretis’e.
Dia 9 di september 2020 Parlamento di Aruba a pasa e ley mes di Ombudsman unanimamente. Dia 24 di februari 2021 Parlamento a cuminsa trata e cambio den nos Constitucion pa por ancra e Ombudsman aden y dia 10 maart 2022 parlamento a vota pa e ley aki. Lamentablemente solamente MEP y RAIZ a vota pro e ley cu a pone cu esaki a wordo desaproba. Pesey, despues di e reunion aki, sigur mirando e importancia y necesidad di un Ombudsman, sr. mr. Edgard Vrolijk a haci algun cambio den e ley y a presenta esaki na Parlamento. Dia 23 di januari 2023 e cambionan aki a wordo aproba y desde e tempo aki e proceso di nombracion di e prome Ombudsman a cuminsa. Di e forma aki dia 8 di juli 2024 e prome Ombudsman di Aruba a keda formalisa.
Un pabien grandi na nos prome Ombudsman sra. Jurima Bryson, na Aruba y tambe na sr. mr. Edgard Vrolijk pa e logro grandi y importante aki!
