Tik tok tik tok, ta loke por scucha den caso IBIS y Avestrus, dos caso di corupcion masal y historicamente un berguensa pa nos nacion. E dianan ta pasando y sigur pa caso IBIS cual veredicto final lo wordo decreta Diamars 7 di februari 2023, pa ta exacto aki 6 dia! Esaki ta haci cu tin un presion enorme di panico den Cas di Partido AVP hunto cu nan aliadonan den prensa di 24 ora y Awemainta. Por a wak e strategianan combina con nan ta purba “desvia” e atencion di e realidad cu ta batiendo na nan porta. E realidad cu solamente Hues por cambia pa partido AVP. Sinembargo den caso IBIS ya Abogado General di Cassatie di Hulanda a duna su conseho: “E Veredicto manera e la wordo duna den prome instancia y den HOF mester keda respeta!” E tsunami ta na caminda y pa awo e ta algo inevitabel. Den caso Avestrus, Hues a laga sa di aña pasa caba cu probablemente e lo declara su veredicto na februari 2023. Nos ta “zo ver,” y Benito por sinti e presion hunto cu su coleganan di e “corupcion” comun. Ta interesante pa wak con net Benito, cu ta wardando su sentencia, ta purbando tur sorto di manera pa trata na daña e bon nomber di nos Minister President. Cu desesperacion e ta gritando cu ta persecucion politico, cu OM ta partidario, cu recherchenan y PG ta narcista. Di e forma aki e ta spera di libra su mes di e “imagen golpia” cu e tin. Hamas lo por hustifica ni defende ningun caso di corupcion, sin importa e color politico. Sinembargo pueblo por husga si e proceso y transparencia con esakinan a bai!

Ta bon pa wak con MEP a bin ta atende cu e caso Arubahuis y con AVP ta atende cu su casonan. Manera partido MEP a bin ta bisa, cu cada ken cu haci malo mester sinta riba su blaar y paga e consecuencianan!

Caso Aruba Huis;

  1. Ora cu un carta oficial cu e hechonan a wordo manda pa Minister Presidente, el a laga investiga esaki. Minister Presidente a manda CAD y DRH bay investiga profundamente y traha un rapport.
  2. E rapport di CAD y DRH a wordo traha y mester a haya un evaluacion y conseho riba esakinan, cual a sucede tambe.
  3. Unabes cu e consehonan a wordo duna, a prepara y a invita Parlamento di Aruba na un OB pa asina informa Parlamento y pueblo cu hecho, cifras y data kico a sucede den Aruba Huis.
  4. Despues cu esaki a sucede, a entrega e dossier na OM y un keho oficial a wordo entrega di parti Minister President contra sr. Besaril.
  5. Awor OM ta pasando den e dossier pa wak cual te pasonan legal cu lo tuma contra sr. Besaril.
  6. Fuera di tur esakinan, a duna conferencia di prensa y a bay Parlamento mas di un biaha pa duna informacion na pueblo. Parlamentarionan a vocifera nan opinion riba Arubahuis.

Caso IBIS/Avestrus;

  1. Nunca a duna ningun informacion y a tapa tur loke a sucede. Esaki ta e bon comun di Mike Eman?
  2. Nunca a laga CAD of DRH of otro instancia investiga e sucedido. (Doofpot comun)
  3. Nunca a bay Parlamento ni a duna conferencia di Prensa pa informa pueblo. (Panico Comun)
  4. Alcontrario, a firma un ley pa por a sigui paga ex-minister den e caso pa sigui cobra legalmente. Un berguensa historico. (IBIS) (Corupcion y aprobacion di maldad comun)
  5. Nunca AVP su ministernan ni parlamentarionan a vocifera contra e casonan, sino a brasa corupcion. Nunca nan a denuncia ni aleha di e casonan y asina mas caso a keda brota den e seno di AVP. (Falta di integridad y honestidad comun).

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!

LEAVE A REPLY

Please enter your comment!
Please enter your name here