Nos pueblo ta rabia, y e ta rabia cu su rason. Critica, desapunto, y un infelicidad ta reina den un gran mayoria di nos poblacion despues cu Corte di Casacion a dicidi cu matrimonio di mesun sexo mester keda legalisa aki na Aruba. Nos ta un pais multicultural cu tin su creencia, su tradicionnan y su norma y balornan. Informacion di diferente fuentenan ta mustra cu mas di 85% di nos pueblo ta religioso y pesey nos cultura y tradicionnan ta hopi critico contra e veredicto di e Corte di Casacion. Mas cu claro pueblo ta sinti cu su bos, balornan y tradicion a wordo ignora y poni un banda den e caso aki, y pesey pueblo no kier guli e pilder aki.
“Hulanda a haya e forma” pa impone matrimonio mesun sexo riba Aruba
No ta un secreto cu for di varios decada Hulanda a bin ta presiona Aruba pa adopta e ley di matrimonio di mesun sexo. E “flie” aki nunca a subi, pasobra nos cultura, balornan y tradicionnan sigur ta masha diferente cu esun di Hulanda. Nos tur por a scucha varios politico Hulandes incluyendo ex-Secretario di Estado Alexandra van Huffelen duna su comentario riba e asunto aki, y trata na crea un presion “politico” riba nos pais pa implementa e ley di matrimonio mesun sexo. Asina mes Aruba semper a para pa su derechonan y a resisti e presion di Hulanda y a cana su mesun caminda. Corte di prome instancia a declara, den e caso di Fundacion Orguyo contra pais Aruba, cu gobierno mes mester busca e forma di soluciona e problema, pero Corte Comun ni Casacion no a basila pa impone esaki manera nan a haya un chens.
Pueblo ta indigna cu decision di Corte di Casacion
E reaccion di pueblo sigur no ta un sorpresa ora cu nan a scucha e sentencia di huesnan di casacion. Nos pueblo ta indigna, rabia, desapunta y ta expresando esaki na radio, medionan social, den circulonan di amistad, na trabao y unda cu nan por. Tin un descontento formal cu no ta bay stop. Pueblo simplemente NO kier a ley aki y ta rechas’e formalmente.
E lucha no a caba; “E la apenas cuminsa!”
Mi kier reitera cu mi lo sigui lucha pa e norma, balornan y tradicionnan di nos pueblo cu no kier e ley aki riba su lomba. Nos ta biba den un democracia y danki Dios tin diferente recurso y trayecto cu nos por cana pa cambia e veredicto aki. E ta bay tuma tempo, lucha y sacrificio, pero e mester wordo haci. Democracia ta facilita e derecho pa explora e opcionnan aki y mi ta convenci cu esaki lo ta e siguiente pasonan di mi accionan.
