Vision di proteccion pa nos muchanan
Varios luna pasa a nace den mi curason pa cuminsa traha riba un ley di iniciativa (un ley nobo) cu lo bay protege nos muchanan na scol. Nos pais ta parti di e reino Hulandes, y mirando cu ya caba na Hulanda tin lesnan di indoctrinacion sexual inadecua ta tumando lugar, mi a dicidi di traha un ley pa preveni cu lesnan aki por yega nos scolnan. Na Hulanda mes mi a tuma nota atraves di varios articulo, rueda di prensa y debate den Tweede Kamer cu tin hopi docente, mayornan y politiconan desapunta y rabia, cu ta luchando contra e lesnan controversial aki.
Muchanan no tin capacidad pa procesa temanan compleho y controversial
E realidad ta cu na Hulanda muchanan ta wordo siña e lesnan di indoctrinacion sexual inadecua aki for di 3 aña di edad bay ariba. E pregunta ta; ki lugar e temanan aki tin di haci cu muchanan chikito? Con e gobierno Hulandes ta spera muchanan chikito por procesa e tipo di informacion aki? Con por ta cu un gobierno ta dicidi di indoctrina mucha chikito cu un ideologia controversial sin tene na cuenta e norma, balornan, tradicion y creencia di e mayornan y docentenan? Ademas, estudionan internacional di expertonan ta demostra cu e cerebro di un ser humano ta stop di desaroya apenas entre 25-30 aña! Mi opinion: “Laga Mucha Ta Mucha!”
Ley nobo ta duna tur autoridad di educacion sexual sensitivo bek n’e mayornan
Fuera di protege nos muchanan den scol, e ley nobo aki ta duna e mayornan tur autoridad bek pa educa nan muchanan riba e temanan sensitivo aki ora cu nan ta sinti esaki ta adecua. No por ta asina cu un instancia, gobierno, fundacion of persona por impone su creencianan of filosofianan personal of general riba otro hende y mucho menos riba nos muchanan! E derecho aki mester keda den e mannan di e mayornan, cu ta protege y educa nan yiunan segun e norma y balornan cu nan ta haya ta importante na cas y den nan famia. E ta importante pa e mucha disfruta di su infancia y e tempo cu su mente lo habri ta varia di mucha pa mucha.
Ley di Proteccion di Mucha ta na DWJZ
Diahuebs, October 31 2024 e concepto di ley di proteccion pa nos muchanan a wordo manda oficialmente pa DWJZ pa revision y consehonan pa cambio. Manera esaki bin bek e cambionan sugeri lo wordo incorpora y lo manda e ley pa Raad van Advies. Esaki ta un iniciativa di ley hopi importante pa tur muchanan di nos pais keda protegi, nos norma y balornan keda respeta y nos future generacionan por sigui progresa sin distraccionnan innecesario den nos educacion. Como iniciador di e ley aki mi ker a reconoce e sosten di coleganan cu ta co-iniciador di e ley aki; coleganan Hendrik Tevreden, Darlaine Guedez-Erasmus, Shailiny Tromp-Lee, Ricky Hoek y Ryçond Santos Dos Nascimento.
