Dia 17 di September 2024 mi a haci exactamente 3 aña trahando como representante di Pueblo den e organo di mas halto cu ta e Parlamento di Aruba. E tres añanan aki a pasa liher sigur, sinembargo durante e tres añanan aki mi no a para keto y asina mi a logra produci varios logro cu ta importante pa mi comparti awe cu pueblo.
Tres Ley den Tres aña.
Durante e tres añanan aki mi a enfoca como legislador pa introduci leynan beneficioso pa nos pais y specialmente nos muchanan tambe. Esaki ta e tres leynan:
- Ley di referendum. E ley aki lo empodera e bos di pueblo pa por dicidi riba temanan cu pueblo ta considera sensitivo y delicado. Temanan cu ta toca e norma y balornan di nos pueblo y riba cual pueblo mes lo kier laga Gobierno y Parlamento sa si nan ta rechasa of acepta esaki. Referendum ta fortalece bos di pueblo y nos democracia.
- Ley di Proteccion di Muchanan. E ley aki ta enfoca pa protege nos muchanan na scol contra indoctrinacion di “ideologia di genero.” E ley aki lo evita materialnan di e tema aki yega na nos scolnan pa “motiva y activa” muchanan di 3 aña bay ariba pa papia riba temanan inadecua pa cual nan no ta cla ainda. Cu wowo riba e retonan creciente den e era moderno aki, ta importante pa scolnan keda educa nos yiunan riba e cursonan cu lo preparanan pa ta un profesional den futuro y no riba temanan activista di ideologia di genero.
- Introduccion di un cambio di Ley (Amienda) riba e ley di Integridad Ministers. Na October 2021, den mi prome reunion publico mi a introduci un cambio di ley cu a wordo aproba pa Parlamento cual ta encera cu tur persona cu kier bira minister den futuro, lo mester pasa testnan di droga.
Tres mocion cu a bira un realidad.
Un mocion ta un deseo di un Parlamentario, pa wak gobierno ehecuta algo specifico. Aki ta sigui tres mocion di mi persona cu a bira of ta birando un realidad:
- Mocion pa baha e prima di AZV pa pensionadonan a bira un realidad; Minister Dangui Oduber a baha e prima di AZV di 10.5% pa 5%. Esaki ta scapa e pensionadonan alrededor di AWG 100.- pa luna.
- Mocion pa bin cu un Waf turistico pa crucero; Recientemente Minister Dangio Oduber a anuncia un masterplan pa usa terenonan di Refineria pa un Proyecto grandi cu ta encera un waf pa yatenan luhoso of barconan crucero, cientos di vivienda, un “Malecon,” y hopi mas na San Nicolaas. Esaki lo bira e siguiente Proyecto grandi pa gobernacion 2024-2028.
- Mocion pa bin cu RWZI nobo na Bubali plas y mantencion structural di tur planta a bira realidad; Esaki a wordo formalisa den un ley na cuminsamento di aña y aworaki ta den su fase di financiamento y ta cla pa cuminsa traha riba dje na 2025.
Fuera di tur esaki mi a wordo reconoci dos biaha den e “rapport” di Parlamento, como e parlamentario cu ta cuestiona y haci mas pregunta na gobierno riba su maneho. Mi a pidi rapportnan, data, investigacionan y a haci preguntanan skerpi y alcaso pa por controla gobierno debidamente. Pesey mi si abo kier wak e leynan y mocionan aki wordo cristalisa, yudami continua mi trabao den Parlamento di Aruba.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!
