Niun hende no por tuma Miguel Mansur na serio mas. Su expresionnan, menasanan y gañamento structural ta un peliger pa nos sociedad. Miguel a demostra cu e ta hiba un politica destructivo pa nos economia, ta usando su posicion parlamentario pa intimida ciudadanonan, y ta coriendo cu un vision cu lo termina cu e unico pilar economico cu nos tin: nos turismo.
Miguel Mansur atentando contra nos turismo
Miguel Mansur a bay “live” algun luna pasa y a declara cu tur claridad di kier cuminsa “kita erfpachtrecht di hotelnan,” pa despues tumba esakinan. Ademas Mansur a declara algun siman pasa cu e kier “limita e cantidad” di turista pa drenta Aruba. Ta parce cu Mansur, cu por cierto no a biba cu pueblo den e periodo catastrofico di e pandemia cu nos, nunca lo por compronde cu miles di hogar a wak sernan stima sufri y fayece. Otro famianan a perde trabao, nan entrada, nan pan, no por a paga nan debenan, famianan a perde nan cas, auto y otro bienes. Pa un miyonario cinico, cu nunca a pasa den pobresa, hamber y necesidad, nos turismo ta parce algo cu por trata con cu ta. Awor mas cu nunca pueblo ta stima nos turismo cual ta significa trabao pa nos pueblo, entrada pa nos famianan, y pa Aruba un economia cu por draai y haci nos soñonan bira un realidad.
Miguel Mansur contra turismo: “Aruba tin mucho Turismo”
Den e ultimo simannan Miguel Mansur a bin ta papia di over-turismo y ta mencion’e continuamente. Esaki ta confirma su postura di kier limita e cantidad di turista drenta Aruba, basha hotel abao. Ora cu no tabata tin entrada suficiente y inversion den nos pais, Mansur a grita acusa gobierno, cu tabata luchando cu falta di entrada, pasobra turismo tabata masha abao mes. Awo cu cos a drecha, Mansur ta grita tin mucho turismo!! Kiermen un surplus pa paga debe, inversion tur caminda, duna bek na pueblo den forma di indexering, placa pa stichting, gehandicaptenuitkering, proyectonan di husticia, deporte, educacion y hopi mas no ta bon tampoco pa Mansur! Ma ta kico e loco aki kier anto? Caba cu Aruba? Asina bo sa!
Otro expresionnan y accionnan peligroso di Mansur contra nos sociedad
No ta pornada mi lo keda skirbi y expone e menasa serio cu Mansur ta representa pa nos pais. Aki ta sigui algun di su expresionnan y accionnan peligroso cu e la haci y declara den passado:
- Miguel Mansur a exigi un lista cu nomber di ambtenaar pa cuminsa kita 1.500 persona;
- Miguel Mansur ta exigi pa declara tur stranhero cristian hendenan non-grata, kita nan permiso inmediatamente y deportanan sin misericordia.
- Miguel Mansur a gaña riba lidernan religioso, bisando cu nan ta mina nos democracia y a menasa Parlamentarionan. Declaracionan falso y Cristo-fobico.
- Miguel Mansur a demostra cu e tin un guera contra Cristianismo ora e la exigi pa creyentenan Cristian cera nan boca y pa no mete den politica, y cu nan por mester habri un partido politico si nan kier vocifera un opinion politico. Di e forma aki Mansur a “trapa” literalmente riba derechonan constitucional di pueblo cu tin e libertad pa expresa nan mes. Kende e lo kier silencia despues?
- Miguel den su fobia contra Cristo y Bijbel a saca scrituranan sagrado for di contexto pa trata na ridiculisa e religion Catolico y Cristian.
- Miguel Mansur ataca clero catolico yamando nan pa homosexual den un post riba Facebook. (Ainda e post tey)
- Mansur supuestamente ta boga pa igualdad, inclusion y stop descriminacion, pero dia y nochi ta ofende, menasa y insulta tur esnan cu tin un opinion opuesto riba su agenda.
- Mansur a menasa dos candidato pa Ombudsman, exigi pa nan retira pa su candidata faborito por bira e Ombudsman nobo. Di e forma aki Mansur a politisa y usa menasa contra tur etica y derecho di e ciudadanonan aki.
