Minister Arends a sali papia di un maneho cu el a hereda cu no ta integro y cu pesey e mester a cambi’e. Partido MEP no ta haci wega cu corupcion pero ta denunci’e y ta conden’e. Nos a demostra esaki continuamente. P’esey, no tin nada contra cambionan proponi pa tur cos keda transparente y husto pa tur hende.
E problema cu ami y mas hende tin ta specialmente riba e proceso, e forma con tur cos a bay. E por a bay miho, hopi miho! Sinembargo si minister di Transporte, Naturalesa y Integridad ta considera integridad algo asina importante e ora algun pregunta pa su persona ta:
- Minister por duna un splicacion amplio pakico Minister ta bisa cu e maneho anterior ta crea espacio pa corupcion pero desde cu Minister a bira Minister di Transporte a sigui aplica e mesun maneho y no a stop esaki inmediatamente?
- Minister por informa cuanto peticion di traspaso Minister a ricibi desde cu Minister a bira Minister di Transporte te cu awo?
- Minister por informa cuanto di e peticonnan aki a wordo honra?
- Minister por informa cua ta e criterianan pa cu Minister ta usa pa evalua si un peticion di traspaso ta wordo honra of no a base di articulo 15 di Landsverordening personenvervoer?
- Minister por informa cuanto traspaso di permiso di transporte publico a wordo coruptivamente duna door di Minister si ta papia cu e maneho bieu y esun actual ta crea e posibilidad pa corupcion?
- Minister por informa cuanto caso a ser a denuncia na Ministerio Publico di traspaso(nan) di permiso di transporte publico coruptivo cu Minister ta referi na nan?
- Minister por informa caso a ser denuncia na Ministerio Publico como practica di benta di e permiso di transporte publico? Mi ta spera di por ricibi contesta di Minister mas pronto cu ta posibel.
Draft di maneho di minister Arends tabata “ter inzage” 4 dia prome cu mocion a wordo aproba
Den un di e declaracionan haci pa minister Arends el a indica cu un mocion a wordo aproba pa 15 miembro di Parlamento na december 2023 pa asina e por a tuma pasonan necesario. Minister Arends a usa e mocion aki como un forma pa hustifica e manera con el a implementa su maneho nobo riba taxistanan, esta di no por a warda un dia mas pasobra tin corupcion andando. Minister su declaracion a zona manera tur Parlamentario tabata na altura di e maneho di taxista y tabata di acuerdo cu esaki door di e un mocion. Ora a haci bay busca pa sa ki dia minister Arends a pone e maneho ter inzage den Parlamento, a bin constata cu ta un draft di e maneho a wordo poni ter inzage dia 14 di december 2023, mientras cu e mocion mes a wordo entrega dia 18 di december 2023. Kiermen minister Arends tabata tin e draft di e maneho cla caba prome cu mocion a wordo entrega. Den otro palabra minister Arends a malinforma pueblo cu el a basa su maneho riba e
mocion, pasobra su draft di maneho tabata cla caba 4 dia prome cu e mocion a wordo aproba den Parlamento.
Parlamento no ta na altura di e maneho di Minister
No ta inusual cu Ministernan ta bin Parlamento pa asina ricibi ‘gevoelens’ di Staten riba cierto cambionan di ley of maneho. Riba e topico aki Parlamento no a reuni cu Minister pa cu e maneho aki. Pa e motibo aki mes Fraccion di MEP a entrega un peticion dialuna ultimo, dia 5 di augustus, pa asina Minister bin informa Parlamento di esaki durante reunion di comision fiho di transporte.
Tambe ta lamenta cu Minister ta informa cu den un reunion publico su maneho a wordo poni ‘ter inzage’, mientras cu ta un “draft di e maneho el a pone ter inzage”. Practica comun ta cu Parlamentarionan ta cuestiona of pidi cambio den e maneho di ministernan. E ta e motibo pakico dia 18 di december a entrega un mocion pidiendo cambio den e “draft” di e maneho.
Good Corporate Governance ta exigi pa reuni cu stakeholders y bin bek na Parlamento pa informa di e maneho oficial cu minister lo hiba tumando nan puntonan den consideracion. Ta exactamente loke ta para tambe den e mocion “pa bin cu reglanan rasonabel pa vergunninghouder”. Lamentablemente e proceso cu a ser encamina pa Minister Arends, a conduci na un protesta y cu a perhudica nos pueblo y turismo.
