Parlamentario Marco Berlis (MEP): Mike Eman a laga pensioen na snechi

Algun dia pasa Mike Eman a sali den un rueda di prensa y a promete cu ora AVP drenta gobierno e lo “redobla” pensioen di nos grandinan. Mirando cu Mike Eman no gusta traha cu rekensom, e la wordo puntra con ta bay paga pa esaki. Mike Eman a responde: “Bo tin cu wak unda bo tin di CORTA y bo tin di fiha prioridadnan cu ta na interes di henter bo pais”. Esaki ta e lenguahe politico cu Mike Eman a usa pa anuncia na pueblo cu AVP lo sigui “CORTA” cu medida pa supuestamente cumpli cu su promesa. Mike su desesperacion pa pone un AVP na werki bek riba pia, awo ta hungando cu e sentimento di nos grandinan. Sinembargo, pensionadonan hamas lo lubida con Mike a masacranan cu medida durante su gobernacion di 2009-2017. Den tempo di bonansa Mike Eman a “CORTA” pensioen lag’e na snechi. Cu Mike su declaracion, awo e destructor di pensioen kier pretende di ta su salbador? Historia a demostra cu Mike lo papia cualkier cos pa bin bek na poder!

Historia y hechonan ta mustra nos cu no por confia Mike Eman su promesanan

1. Mike Eman a grita den campaña di un forma dramatico cu e lo kita BBO. Kico a sucede? Mike Eman a subi BBO te na 3.5%, y a bulldoze e ley di BAZV den Parlamento di Aruba.
2. Mike Eman a drenta gobierno y a bisa cu e lo atende cu e debe nacional y bah’e. Kico e la haci? E la redobla nos debe nacional y e interes a bay di 110 miyon pa 283 miyon pa aña!
3. Mike Eman a goberna den tempo di bonansa y no a subi pensioen, alcontrario, e la ‘CORTE’!
4. Mike Eman enbes di a ‘redobla’ pensioen durante su gobernacion na 2009-2017, a practicamente CORTA y “halveer” e entrada di pensionadonan na snechi.
   

Memey di bonansa Mike Eman a caba cu pensionadonan den su gobernacion di 2009-2017

1. Mike Eman a haci tur pensionado perde nan bashipremie, gelijkbedrag y tambe back to school premie. Haciendo esaki Mike Eman a kita miles di florin na beneficio pa aña for di pensionadonan, lagando nan entrada mescos cu garnachi.
2. Middelloonregeling a mata e structura di pensioen drasticamente, y pensionadonan a bay atras cu cientos, y tin biaha miles di florin pa luna. Unda antes pensionadonan tabata haya 70% di nan ultimo salario ricibi di trabou, Mike Eman a calcula un promedio di nan salario durante nan carera y duna nan 70% riba esey!
3. Mike Eman a subi edad di pensioen di 60 pa 65 aña, asina kitando un biaha mas 5 aña di pensioen for di nos grandinan. Si conta 5 aña di pensioen na mil Afl. 3 mil mes, Mike Eman a kita Afl. 60-180 mil of mas for di nos grandinan! Acaso Mike Eman ta kere cu pensionadonan lo lubida su traicion?
   

Contrario na AVP, desde Gabinete Wever-Croes a drenta gobierno, a subi pensioen 6 biaha pa un total di 15% entre 2017-2024. Ademas segun indicacionan, gobierno lo por subi e pensioen e aña aki atrobe substancialmente. Esaki ta e realidad: MEP ta subi pensioen apesar di tur crisis cu a asota nos pais, mientras cu Mike Eman a laga e pensioen den “coma” den tempo di bonansa!

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo Parlamentario y sirbidor di pueblo na bo ordo semper!