Desde inicio di e gobernacion aki mi tabata tin un vision pa San Nicolaas haya su propio Waf turistico. Ma vocifera, presenta un mocion pa urgi gobierno traha riba e waf, ma sali den prensa y a lobby pa esaki wordo concretisa. E vision pa aumenta e economia y inversion den San Nicolas ta algo importante pa nos ciudad industrial haya bida atrobe. Un waf turistico na San Nicolas sigur lo atrae inversionan grandi for di e sector priva, cu lo embeyece y engrandece e ciudad, su infrastructura y su alrededornan.
Mocion entrega desde 31 di Maart 2022
San Nicolaas tin su mesun vision di arte, cultura y otro aspiracionan. Pa fortifica y realisa esakinan mester bin inversionnan fuerte di sector priva y crea un forma con pa produci consumidornan na gran cantidad cu kier bay gasta nan placa na San Nicolaas. Aki ta unda gobierno lo por aporta biniendo cu un waf turistico pa barco crucero, invita e companianan crucero pa bishita e waf nobo aki cu lo por trece miles di bishitante cu lo come den San Nicolaas su restaurantnan, cumpra den su tiendanan, admira e arte existente, bay riba un tour, y disfruta di actividadnan cultural. E posibilidadnan ta inmenso ora tin fluho grandi di hende y placa, y di e forma aki pueblo, entrepreneurnan y comerciantenan lo por crece y probecha di e fluho turistico.
Vision di Ministerio di Turismo di Minister Dangui Oduber
E fruta di e vision di Minister di Turismo ta hopi evidente na San Nicolaas. Ministerio di Turismo a laga haci un estudio pa un desaroyo turistico na San Nicolaas, pa asina trece desaroyo, prosperidad y inversion. Desde 2017 a anuncia un masterplan pa e area di Sero Colorado;
- Trapi di Rodgers Beach a wordo drecha y embeyeci.
- Area di parking di Baby Beach a wordo drecha y mehora.
- E aña aki lo cuminsa pa renoba e canchanan di Tennis y lo bay construi algun cancha multifunctional.
- Lo bay construi restaurant.
- Proyecto di upgrading y embeyicimiento di Rodgers Beach tambe lo cuminsa pronto.
- Hotel Secrets ta den pleno desaroyo.
- Awor ta e momento pa cuminsa cristalisa un plan pa un waf na San Nicolaas.
Tanto Minister Dangui Oduber y Minister Glenbert Croes ta trahando hunto pa establece e tereno cu lo bay wordo usa pa e waf di crucero y e tereno cu lo bay wordo usa pa Hydrogen Valley. Mi lo continua pa monitoria y vocifera e avansenan di e iniciativa di e waf turistico pa San Nicolaas di cerca cu sigur lo ta un proyecto cu lo impacta e ciudad y su alrededornan positivamente.
